I League champion Gokulam Kerala

Mizo tlangval Zodingliana Ralte telna Gokulam Kerala chuan I League nomawi humhim turin Salt Lake Stadium-ah Mohammedan SC 2-1 in an hneh. Inrinni zana khelh I League match hnuhnung ber hi champion zawnna a nih avangin final tih ang hiala sawi theih a ni a, nomawi chawi phu zawk Malabarians-in hnehna an chang.

Mizo tlangvalte
I League final thlen theih chhan hi Mizo tlangvalte vang a ni a, Sreenidi Deccan-in Lalromawia hattrick hmanga Gokulam Kerala an hneh zarah Mohammedan-in beiseina an neih theih phah.

Samlukhai tlangval Romawia hi a che ṭha zui a, Inrinni zan khan Sreenidi-in Churchill Brothers 1-0 in an hneh a, goal awmchhun a khung. Inkhel dangah pawh RoundGlass Punjab leh Neroca te 3-3 in an inhnehtawk a, Mizo tlangval Freddy Lallawmawma'n goal hma hruai a khung.

Final tiha chhal inkhelah pawh winger Brandon VL Remdika leh goalkeeper Zothanmawia ten bul an ṭan a, bench-ah Lalramchullova, Malsawmzuala leh Lalramhmunmawia te an awm.

Gokulam lamah tawnhriat Armed Veng tlangval Zodingliana Ralte-in bul a ṭan a, Shillong Lajong captain hlui Adinga hian season liam ta pawh khan Malabarians hi a champion pui tawh a ni.

Final chu
Mohammedan hi Kolkata club ṭha an ni a, entu pawh an ṭhat phah hle. Salt Lake Stadium-ah entu 41,000 zet an pungkhawm a, champion an tum hle. Amaherawhchu coach Vincenzo Alberto Annese hoten team ṭha zawk an nihzia an pholang.

First half-a goal a luh loh hnuin minute 49-naah Rishad-a'n ṭha taka a lakluh hnuah goal ṭha a khung a, keepr T. Mawia tan dan theih a ni lo. Mohammedan beiseina siam turin Marcus Joseph-a freekick pet chuan substitute Azharuddin Mallick perin goal-ah a lut a, Kolkata tan champion tura chak a ngaih avangin goal khat dang khung a la ṭul.

Mohammedan phur thar mah se tlarhnung pawp an tuar. Minute 61-naah Luka Majcen ball pek chu Emil Benny-a'n ṭha takin a pet goal a, goal dang luh belh tawh loin Gokulam Kerala 2-1 in an chak.

Engtin zel?
I League season chu khelh zawh a ni ta a, Gokulam Kerala chu season zawna champion hmasa ber an ni. Chutihrualin champion ngun ber erawh Dempo an ni a, vawi thum an champion. Gokulam champion theih nan hian Luka Majcen chuan goal 13 tehmeuh a khung a, goal khung tam ber erawh Mohammedan striker Marcus Joseph niin goal 16 a khung.

Aizawl FC erawhin kum zawnin Championship Stage an khel pha lo a, chutihrualin Mizo club hi relegation stage khel zingah an che ṭha ber. I League aṭangin team khat relegate tur a ni a, point 12 hmutu Kenkre an relegate.