Lewandowski-a'n contract thar a ziak dawn lo

Tun season Bundesliga chu Inrinni zan khan khelh zawh a ni ta a, champion Bayern Munich chu an match hnuhnung berah Wolfsburg nen 2-2 in an inhnehtawk. Bavarians-in nomawi chawi mah se season tawp lamah an khel ṭha tawk lo a, an striker chhuanvawr Robert Lewandowski-a'n a contract neihlai a pawhsei loh tur thu a tichiang bawk.

A hmawr bawkna
Volkswagen Arena-ah Bayern-in Josip Stanisic tauh luh hmangin minute 17-naah hma an hruai a, minute 40-naah Thomas Muller siamsak chu Lewandowski-a'n a khung. Bavarians tan hian Muller leh Lewandowski te hi an inkawprem a, an pahnih inkara goal hi 'Mullendowski' goal an ti. Polish striker hi chhuak thei dinhmuna a din avangin 'Mullendowski' goal hnuhnung ber a ni thei.

Wolfsburg-in Jonas Wind hmangin minute 45-naah siphurh an sut ṭhen a, minute 58-naah Max Kruse hmangin siphurh an sut zo a, 2-2 in inkhel a tawp. Bayern manager Julian Nagelsmann chuan, "First half kha kan khel ṭha a, goal tam zawk khung thei pawh kan ni. Second half tir lam kan khel ṭha lo a, a tawp lamah inkhelh kan thunun. Kan chak zawh loh avangin result ṭha a ni lo," tiin a sawi.

Bayern hian Bundesliga nomawi humhim mah se DFB Pokal-ah second round-ah an tla a, Champions League-ah quarterfinal-ah an tla bawk. German football thununtu Bavarians tan Nagelsmann hnuaia an season hmasa berah chhuan tur a awm lo.

Buaina chu
Bayern striker Robert Lewandowksi chuan, "Club ka hrilh tawh a, min duhtu an awm a nih chuan kan ngaihtuah tlan a ngai. Contract thar ka ziak dawn lo a, kei leh club club tana ṭha ber ngaihtuah a ngai," tiin a sawi. Polish striker hian season khat dang contract a la nei a, Bayern hian an chelh a nih chuan 'free transfer' in a chhuak thei ang.

Lewy hian kum 2014 khan Borussia Dortmund aṭangin Bayern a zawm a, match 344 aṭangin goal 374 khung sakin goal khung tam lamah Gerd Muller chiah a pha lo. Club director Hasan Salihamidzic chuan, "Kan dinna kan la thlak lo. June 30, 2023 thleng contract a la nei," tiin chelh thei dinhmuna an din thu a sawi.

Nikum khan Lewy hian Bundesliga match 34-ah goal 43 a khung a, season khat chhunga Bundesliga-a goal khung tam ber record Muller siam chu a khum. Tun season-ah inelna hrang hrangah goal 50 a khung a, league bikah goal 35 khungin kum 33 mi ni tawh mah se a ṭha tih chu a chiang.

Engtin zel?
Bundesliga aṭangin Bayern, Borussia Dortmund, Bayer Leverkusen leh RB Leipzig ten Champions League an khel dawn a, Europa League-ah Union Berlin leh SC Freiburg te an khel ang a, Conference League-ah FC Cologne an inlan ang.

Table hnuai lama awm Arminia Bielefeld leh Greuther Fürth te 2. Bundesliga-ah an tla thla a, 16-naa awm Hertha BSC-in Bundesliga khel zel turin playoff an khelh a ṭul ang.