Australia cricket legend Symonds a thi

Australia cricketer Andrew Symonds chu car chetsualna avangin May 14, Inrinni khan kum 46 mi niin a thi. All rounder ṭha mi Symonds hian kum 1998 leh 2009 chhung khan Australia tan Tests match 26, ODI match 198 bakah T20 match 14 a khel a ni.

Symonds hian Australia hi ODI Cricket World Cup-ah vawi hnih a champion pui a, kum 2003-a an champion ṭum khan thi loin 143 runs an siam. Semifinal-a Sri Lanka an hneh ṭum pawhin thi loin 91 runs a siam leh bawk. He inkhel pahniha a chet dan ringawt pawh hian Australia-a a dinhmun a sawifiah.

Symonds hi bowling leh batting bakah fielder ṭha bik a ni a, Australia captain hlui Ricky Ponting pawhin a hmuh tawh zinga fielder ṭha ber a nih thu a sawi. Australia-in cricket khawvel an thunun laia Aussies tana player pawimawh a ni pha a, amah ngainatute chuan hmui hnawih var chunga a inkhel lai an hre reng tawh ang.

Queensland police-te chuan thuchhuah siamin kawngpuia a tlan liam hnuah a lum thu an sawi a, chhan tumin bei ngial mah se a inhliam vanga chhan theih a nih loh thu an sawi. Symonds-a nupui Laura chuan, "Mak kan ti a, an fate pahnih ka ngaihtuah hle," tiin a sawi.

Cricket Australia, cricketer lar Adam Gilchrist, Jason Gillespie, Darren Lehmann, Glenn Maxwell, Michael Vaughan, Sachin Tendulkar, Shoaib Akhtar, Johny Rhodes, Suresh Raina bakah player ṭhahnem takin twitter leh IG kaltlangin thlahna thu an ziak.