Messi-a'n goal hnih a khung

Lionel Messi-a goal hnih hmangin Paris Saint-Germain chuan Montpellier 4-0 in an sawp. Season kal laia goal khung harsat Messi chet danin PSG fans a tilawm a, season thar hlimthla tur niah an ngai.

Inrinni zan Ligue 1 inkhelah Messi hian a tir lam minute 20 chhungin goal hnih a khung, a goal pahnih hi Kylian Mbappe siamsak ve ve a ni. Chawlhlawk hmain Angel di Maria chuan a khung belh bawk.

Second half-ah Mbappe-a'n ama penalty hlawhchhuah a khung belh. France international forward hian tun season Ligue 1-ah goal 25 a khung ta a, inelna hrang hrangah goal 36 a khung ta chiah.

PSG manager Mauricio Pochettino chuan, "Kan khel ṭhain engkim a kal fuh vek, a tir aṭanga a tawp thleng khan lawmna tur hlir a ni. Ka hmuh dan chuan tun ṭuma kan game hi nakin zela kan khelh dan tur a nih ka beisei.

"Player senior zingah naupang lam an inlan tam a, an khelh dan khan min tilawm takzet," tiin a sawi. Di Maria pawhin an team game chu lungawi thlak a tih thu a sawi, ani erawh season tharah chuan a chhuah ngei a rinawm.