Bungkawn leh BVT an chak

Tualchhung volleyball inelna lian - Zothan Autoworks Pro Volleyball League-ah hmeichhe inelna khelh a ni a, team ṭha Bungkawn leh Bethlehem Vengthlang ten an khingpui ve ve an hneh.

Zirtawpni zan R. Dengṭhuama Indoor Stadium, Mualpuia inkhelah Bungkawn hian Durtlang chu 25-17, 25-19, 25-14 in an hneh, an chak theih nan point 30 hlawh chhuaktu F. Lalparmawii a khel ṭha hle.

Inkhel dangah Bethlehem VT tan Elisian Medai a inlar, ani hian point 24 neiin a team hi Kanan lakah 25-17, 25-19, 25-14 in hnehna a chanpui ve bawk, inelna neih laia a vawi khat nan hnehna an chang.

Hmeichhe inelna huanga team pali ten match hnih ṭheuh an khel tawh, hmahruaitu Bungkawn hi vawi hnih an chak tawh. BVT leh Kanan te vawi khat chakin, Durtlang erawhin chak ni hmel an la hmu ve lo thung.

Zanin hian a hmun ngaiah inelna neih chhunzawm a ni dawn. Mipa team champion lai Chhinga Veng Spikers leh Hunthar te an inkhel ang.

Hmeichhia - May 14, Zirtawpni
Bungkawn 3 - 0 Durtlang
(23-25, 25-18, 25-11, 25-16)
D3 Business Player of the Match: F. Lalparmawii, Bungkawn

Bethlehem VT 3 - 0 Kanan
(25-17, 25-19, 25-13)
D3 Business Player of the Match: Elisian Medai, Bethlehem VT

Mipa - May 16, Thawhṭanni
Chhinga Veng Spikers 08:00 PM Hunthar
May 17, Thawhlehni
Durtlang North 08:00 PM Tuichangral