Premier League-ah Forest an kir hnai?

Championship aṭanga Premier League khel turin Fulham leh Bournemouth an tling chiang tawh a, hmun ruak pakhat dang a la awm - playoff hmangin league table-a pathumna aṭanga paruknaten hmun ruak hi an inchuh.

English football club ropui ṭhin Nottingham Forest-in English top flight league-a kir ngei an duh a, an duhna chu khelmualah thiltihin an lantir. Playoff semifinal first leg-ah Sheffield United chu 2-1 in an hneh.

Forest tan Jack Colback leh Brennan Johnson ten goal khat ve ve an khung a, Sheffield tan Sander Berge chuan hun pek belhah goal khat a rawn khung ve bawk - second leg atan a team beiseina a siam.

Playoff semifinal inkhel hmasa zawkah Luton Town leh Huddersfield Town te chu 1-1 in an inhnehtawk bawk a, second leg khelh tur a la awm avangin thil tam tak a la thleng thei.

Forest beiseina
English club ropui sawi a nih apiangin Nottingham Forest hming a lo lang ve ṭhin. 1977-78 season khan first division champion an ni a, Manchester City la champion lohna European Cup-ah vawi hnih an champion bawk.

Mahse, kum 1999-a Premier League aṭanga an relegate hnuah Forest hi English top flight league-ah an kir leh tawh lo a, fan-ten an nghak rei ta vang vang hle - tun season-ah kirna chance ṭha an nei a, bawhpelh an tum lo.

Sheffield khelmualah pawh goal khung turin Forest-in nghah rei an mamawh lo. Minute 10-naah Philip Zinckernagel-a'n awlsam taka a khung tur nia lang chu Sheffield keeper Wes Foderingham chuan a lo dang.

Mahse, kum 31 mi keeper hian a dang per a, chak taka lo tlan lut Jack Colback chuan a per lehlam hi goal-ah a lo chantir nghal a, hma takah Forest-in hmahruaina goal an khung.

Inkhel hmuhnawm
Sheffield-in goal an chhuah hnuah Premier League an khel duh ve tho tih an pholang a, an nawr let - Irish defender John Egan-a ball tauh ṭha tak chu Forest player Sam Surridge chuan goal line aṭangin a lo tauh chhuak hman.

Mahse, Forest bawk an hlauhawm chhunzawm a, first half inkhel chu an thuhnuaia awm a ni - Ryan Yates chuan uiawm takin a tauh goal lo a, Sheffield keeper Foderingham chuan Surridge leh Johnson chance neih ṭhat chu ṭha takin a dansak bawk.

Chawlhlawkah Sheffield an insiamṭha a, mahse, a pawimawh ber chance an nei hleithei lo. Minute 71-naah Johnson chuan ṭha takin Forest goal hnihna a rawn khung a, mualneitu Sheffield an hawihai.

Forest hi 2-0 in an haw mai dawn niin a lang hman. Mahse, Berge chuan hun pek belh minute khatnaah corner aṭangin a tauh goal a, second leg atan Sheffield-in beiseina an neih phah.

Inhnehtawk
Zirtawpni zan khan playoff semifinal first leg inkhel hmasa zawkah Luton Town leh Huddersfield Town te chu 1-1 in an inhnehtawk a, second leg inkhel a hmuhnawm zual sawt ang.

Huddersfield tan Norwich City aṭanga loan-a an hawh Danel Sinani chuan minute 12-naah goal hmahruai a khung a, Luton tan Sonny Bradley chuan minute 30-naah si phurh a sut - goal dang a lut tawh lo a, an inhnehtawk.

Luton Town khelmuala inkhel boruak sangah team pahnih hi penalty hmu thei ve ve an ni a, an lungawi lo ve ve ang - second 10-na lekah James Bree chu Huddersfield player Harry Toffolo lakah a foul a, penalty chawi ngei tura lang chu chawitir a ni lo.

Mualneitu Luton lawm a kim bik lo; striker Cameron Jerome-a ball um lut chu Naby Sarr chuan a lo titlu a, mahse referee-in hei pawh penalty a pet chuang lo a, 1-1 ah team pahnihin lungawi an zir - zanin dar 12:15-ah second leg-ah an intawng zui dawn a, Huddersfield khelmualah an intawng ang.

May 13, Zirtawpni Zan
Luton Town 1 - 1 Huddersfield Town
LUT: Sonny Bradley 30'
HUD: Danel Sinani 12'

May 14, Inrinni Zan
Sheffield United 1 - 2 Nottingham Forest
SHE: Sander Berge 90+1'
NOT: Jack Colback 10'; Brennan Johnson 71'

May 16, Thawhṭanni Zan
Huddersfield Town 12:15 AM Luton Town

May 17, Thawhlehni Zan
Nottingham Forest 12:15 AM Sheffield United