Newcastle hneh kan tum - Arteta

Arsenal manager Mikel Arteta chuan Tottenham laka an mualphona hliah khuh an tum thu a sawi. Zanin dar 12:30 hian St. James' Park-ah Newcastle United an lenchilh dawn, inkhel awlsam a ni lo ang.

Gunners hian Champions League khelh phak ngei an tum a, chumi tur chuan Magpies hi an hneh a ngai. Khelh hmabak pahnih an la neihah an chesual lo a nih chuan midang result ngaihchan tel ngai loin UCL ticket an nei dawn.

Arteta chuan, "Ka naute chungah rinna ka nghat, kan chak loh hnuah pawh thawh chhuah leh nghal duhin an rilru a huaisen. Anni ho nena kan thawk thei hi ka lawm a, a nuamin a hlimawm takzet.

"Kan khingpui tur Newcastle hian tun hnaiah nasa takin hma an sawn. Tlak hlauhawm zinga mi ni ṭhin kha team hlauhawm zinga mi an ni tawh, an khelh dan phung pawh a danglam tawh hle," tin fimkhur an ngaih thu a sawi.

North London club hi an tlarhnung a buai mek. A laia khel ṭhin Ben White chu damkawr mai a la ni, match hnuhnung bera hnawhchhuah Rob Holding chu hrem vangin a inlan thei dawn lo, Gabriel chuan hliam tenau a nei bawk.

Spanish manager Arteta chuan, "A khel tur chungchangah thutlukna siam theih a la ni lo. Thawhṭanniah an dinhmun enfiah leh a ni ang," a ti, a bik takin Gabriel chu inkhel tura a fit hman beisei a ni.

Season tir lama talbuai, neitu thar an neih hnu pawha che fuh mai thei lo Newcastle hi tunah chuan an insiamrem tawh. Premier League table-ah 14-na an ni mek, an him chiang tawh. An player neih thar an chhawr thiam tawh avangin Arsenal hneh turin theihna an nei ve bawk.