Aizawl FC an tho thei ang em? Chawhnu dar 2:05-ah AFC Vs DSK

RG Stadium-a India rama league sang ber khelh hun kan nghak chhuak leh ta a, vawiin tlai dar 2:05 hian Mizo club Aizawl FC-in Pune khaw club DSK Shivajians an mikhual ang.

Khalid Jamil-a hote hian match hnuhnung berah Chennai City FC hneh lo mah se point 10 an hmuh tawh avangin table-ah pathumnaah an la awm pha tho a, Dave Rogers-a kaihhruai DSK hian point nga an hmu tawh thung.

People's Day
Aizawl FC general secretary Vanlalnghaka Chhawnchhek chuan, "Mipui club kan ni a, DSK nena kan inkhel tur hi People's Day atan kan hmang ang. Hei vang hian ticket zawng zawng hi Rs 50 a zawrh chhuah a ni ang," tiin en man an tih tlawm thu Vanglaini palai a hrilh.

Vawiin hi Mizorama I League khelh a nih hnua ticket tlawm ber ṭum a ni a, TV kal tlanga en theih a nih dawn loh bawk avangin Aizawl FC hotute thutlukna hi Mizo mipui tan thu lawmawm a ni.

Mizo paruk
DSK Shivajians boss Dave Rogers-a'n Mizo club hmachhawn turin Mizo paruk Jerry Lalrinzuala, Jerry Mawihmingthanga, Lallian­zuala Chhangte, Sairuatkima, Ricky Lallawmawma leh K. Lalṭhathanga te a rawn hruai a, inlan tur zat erawh a sawi duh lo.

Bethlehem Veng tlangval Jerry hi Chennaiyin FC tana khel kha a ni a, India junior team tan te pawha captain tawh niin MPL-ah Chanmari FC tan a inlan tawh bawk.

Chanmari tlangval Jerry Mawia hi MPL U17-ah kum zawnin best player leh top scorer chawimawina a dawng thei a, Chanmari FC-in MPL2 an champion-na kawngah player pawimawh a ni a, tualchhung bikah chuan Jerry-a langsar zawk a ni thei a, DSK-a a awm hnuah forward ni tawh loin attacking midfielder hna a chelh.

Lunglei tlangval Lallianzuala Chhangte hian SAFF Cup-a India tana goal a khung avangin a lar hluai a, hmasawn lam a pan zel bawk. MPL3 Qualifier-a Lunglei FC an champion ṭum khan Lianzuala hi top scorer a ni.

Dawrpui Vengthar tlangval Sai­ruatkima hi Dinthar FC-ah hming a chher tawh a, 2014 I Day Football-a Dinthar champion puitute zinga mi kha a ni. Mizo midfielder Sairuata hi feet ruk leh inches hniha sang a ni a, English manager Rogers nen press conference a hmachhawn bawk avangin a khelh a rinawm hle.

DSK Shivajians wing back Ricky Lallawmawma'n a club hlui a hmachhawn dawn a, Chanmari FC, Zo United leh Aizawl FC tana captain armband hreng tawh hi tualchhung football hrec hiang tan mi thar a ni lo.

Bethlehem Vengthlang tlangval K. Lalṭhathanga hi MPL4 best midfielder a ni a, Puitea hian DSK tan left back leh left wing hna a chelh kawp.

DSK an chhawr lo
I League-ah foreigner neih ṭhat a pawimawh a, DSK hian foreigner pali Juan Quero Barraso, Sasa Kolunija, Kim Song Yong leh Shane McFaul te an nei.

Spanish midfielder Juan Quero hi feet nga leh inches thum chauh ni mah se Real Madrid youth system chhuak a ni. Bosian defender Sasa Kolunija erawh feet ruk leh inches ngaa sang a ni thung a, tawn tlang huphurhawm tham a ni.

North Korean striker Kim hi nikum khan Bengaluru FC tan khelin Aizawlah a rawn zin tawh a, DSK striker hian a lenna a hmang thiam hle. Irish midfielder Shane McFaul hi kum 30 chauha upa a ni a, Championship club Brighton & Hove Albion tan te pawha khel tawh player hi India ramah chuan a la laktlak hle.

DSK tana chanchin lawmawm loh erawh keeper tawnhriat ngah Subrata Pal a la dam lo a, AFC keeper hlui Soram Poirei an chhawr chhunzawm zel ang.

Pune khaw club-ah hian Indian player langsar Gouramangi Singh, Nirmal Chettri, Sumeet Passi, Milan Singh, Holicharan Narzary leh Sanju Pradhan te an awm bawk avangin an point hmuh aṭanga en chi an ni lo.

DSK hian match hmasa pahnihah Mumbai FC leh East Bengal-te hneh lo mah se Chennai City an hneh thei a, Mohun Bagan leh Churchill Brothers lakah point khat ve ve an hmu bawk.

Defensive game?
Aizawl FC-in Chennai City an hmachhawn ṭumin ṭum dang ang thoin defensive game an khel a, goal khat an phur hnuah an talbuai a, goal dang an chhuah belh bawk. Mizo mipuiin AFC hi attacking game khel turin an duh a, coach Khalid Jamil-a thutlukna a pawimawh ber thung.

Mizo club hian vawi nga khelhah goal nga an khung a, heng zinga goal hnih hi own goal a ni - anmahni thun chu goal thum chiah tihna a ni.

Ivorian striker Kamo Stephane Bayi-a'n goal a la khung lo a, Syrian midfielder Mahmoud Amna chu tlar hmaa player hriam ber a ni. Chennaiyin FC aṭanga loan hmanga AFC zawmtu Jayesh Rane-a'n goal khung ve tawh mah se goal khung thei tak a nih bik loh avangin Mizo tlangval an pawimawh dawn.

AFC-ah hian Albert Zohming­mawia, Brandon VL Remdika, R. Laldanmawia, H. Lalmuankima leh T. Lalnunpuia te hi tlarhma lama inlan thei tura beisei an ni a, heng player panga hi goal khung lama Mizo innghahna a tih theih ang.

Tlarhnungah Zohmingliana Ralte-in a club hlui a hmachhawn dawn a, Ramhlun South tlangval hian DSK laka goal chhuah a duh dawn lo.

Dave Rogers Way
DSK Shivajians coach Dave Rogers hian DSK Liverpool Academy a enkawl laiin Vanglaini palai hnenah Liverpool khelh dan phunga an khelh ṭhin thu a sawi a, tun ṭumah erawh khelh dan phung thar an neih thu a sawi.

DSK boss Dave Rogers chuan, "Tunah chuan Dave Rogers-a khelh danin kan khel a, chu khelh danah chuan chak duhna, tharum, thathona, phurna leh game rang a tel vek a ni," tiin a sawi a, English coach thusawi hi a dik a nih chuan DSK inkhel a hmuhnawm ang.

Kum 41-a upa coach Rogers chuan, "Tunah hian ka player-te Aizawl-ah an awm kim vek a, buaina kan nei lo. Kan theih ang tawka ṭhain ka khel dawn a, inkhel turah chak zawk a sawi theih lo a, theihtawp erawh kan chhuah dawn," tiin thlawhtheihna ṭum theih loh vanga player eng emaw zat ni khata an thlen tlai vanga buaina an neih loh thu a sawi.

Defensive game tho?
Aizawl FC coach Khalid Jamil chuan, "Attacking game kan khel ang tih ka tiam thei lo. Defensive game leh attacking game kan pawlh ang. Ka player-te an dam kim a, Brandon pawh chhawr theih turin a awm tawh a, inkhel turin kan inpeih tawh," tiin result ṭha neih ngei a tum thu a sawi.

AFC coach Khalid hian goal khung harsat Ivorian forward Kamo Stephane Bayi chuan inkhel bul a ṭan tur thu a sawi chiang bawk.