A sang zawngin Federer
Thawhṭanni zan khan Emirates ATP World Tour Ranking thar tih chhuah a ni a, Grand Slam vawi 18 champion hlim Roger Federer chu 10-na a ni leh ta! Number 1 leh 2 Andy Murray leh Novak Djokovic te an dinhmun ngaiah an ding.
Kum 35-a upa Federer hi nikum February thla khan a hnungzâng na vangin a buai a, Wimbledon semifinal-ah a khup vei lam a hliam bawk. A hliam vangin 2016 ATP World Tour season chawhnu lam zawngah Swiss tlangval hi a inkhel tawh lo.
Kumin season Grand Slam hmasa berah Federer a inlan a, world number 17 a ni! Kum 2001 May thla hnua a ranking hniam ber ṭum ni mah se a champion tho, point 2000 hmuh belhin player pasarih zet a zuan khum leh nghal a - 10 na a ni leh der tawh. Final-a chak lo zawk Rafael Nadal pawhin point 1200 hmuh belhin step thumin hma a sawn ve bawk.
Mipa player zinga Grand Slam chawi hnem ber Federer chuan , "Ka hun tawn hi hre fiah thiam tur chuan hun a ngai deuh hial ang. Switzerland ka thlen hunah pawh a mak ka la ti zel ang. Hman kuma French Open nomawi ka chawi ṭum ang mai kha a nihna chen pawh a awm," tiin a sawi. Federer hi Roland Garros-ah final vawi nga a khelhnaah a champion ve chauh.
Hmeichhe lamah Open Era bika major title la hnem ber Serena Williams chuan Angelique Kerber lehpelin pakhatna a ni leh tawh. American star hian Grand Slam nomawi 23-na chawi turin Australian Open final-ah Venus Williams a hneh.