Manchester khaw club tan nomawi?
Premier League ṭan hmaa champion tura rinkai chu Manchester City leh Manchester City an ni a, Manchester khaw club hian tawnhriat ngah manager Pep Guardiola leh Jose Mourinho hnuaiah season bul pawh an ṭan ṭha hle. Amaherawhchu season chanve a ral meuh chuan United-in point 14-in hmahruaitu Chelsea an pha lo a, Red Devils aia City tamna hi point hnih chauh a ni bawk.
Zanin dar 1:15 hian Manchester City-in London Stadium-ah West Ham an tlawh dawn a, minute 15 hnuah Old Trafford-ah United-in Hull City an hmachhawn bawk ang. Zan dar 1:30 hian United point hlohna Stoke City leh City ngam loh Everton te an inkhel bawk ang.
Hei le, Jesus
Brazilian forward Gabriel Jesus-a'n Manchester City tana a inlan hmasak berah Pep Guardiola hote a chhandam zo lo a, Tottenham lakah inkhel thunun chungin point khat chauh an hlawh chhuak.
Amaherawhchu, FA Cup-a City-in Crystal Palace an hmachhawn ṭumin Jesus hian inkhel bul a ṭan a, Raheem Sterling-a goal khung tur siam sakin City 3-0 in an chak. West Ham an hmachhawn hunah Jesus hian Premier League-a a vawi khat nan inkhel bul a ṭan a rinawm a, City fan-te chuan Olympic-a Brazil gold laksaktu tan hian hla an phuah der tawh.
Hammers lamin an fachuam Dimitri Payet an chan a, City lamin fachuam thar an nei. "Jesus kan nei, Gabriel Jesus. In hre thiam pha lo ang, number 33 a ha a, Rooney chunga leng a ni. Gabriel Jesus kan nei," tiin Payet-a hla zul zuiin hla an phuah.
Kum 19-a upa Jesus hi a hming dik tak chu Gabriel Fernando a ni a, kum 17-a upa a nihin Palmeiras tan a vawi khat nan a inlan. Hemi ṭum hian Palmeiras press officer chuan Isua Krista kum zat jersey number 33 a hak avangin Gabriel Jesus tiha a hming thlak turin a hmin a, a pu hlen bawk.
West Ham hian FA Cup-a City laka 5-0 zeta an mualpho hnuah Premier League-ah chiah beisei tur a nei tawh a, kartawpah pawh match nei loin City atan tawp an inpuahchah thei. London club tana thu lawmawm chu Payet awm loh hnua match hnih an khelhah Crystal Palace (3-0) leh Middlesbrough (3-1) an hmachhawn a, an sawp ve ve. Hei vang hian Pep Guardiola hian tun season-a vawi hnih an hneh tawh Slaven Bilic-a hote hi an en liam ngawt a thiang lo ang.
EFL semifinal rematch
Manchester United-in EFL Cup final lut turin Hull City an hneh a, amaherawchu Mourinho hote hian Paul Pogba leh Zlatan Ibrahimovic te telin Tigers hi second leg-ah an hneh lo.
Hull laka United chak loh ṭum hian Portuguese manager Mourinho chu referee thutluknaah a lawm lo a, chak loah pawh inngai duh loin inkhelh banah 1-1 a an inhnehtawk thu a sawi ngat.
Zanin hian tun season-a a vawi li nan Hull leh United an inkhel dawn a, rinkai zawk Red Devils hian point an hloh a nih chuan champion beiseina a tawpah a ngaih theih ang.