Copa del Rey ; Champion tum Atletico leh Barca inhmachhawn a ṭul!
Atletico Madrid, Barcelona, Celta Vigo leh Deportivo Alaves ten Spanish Cup semifinal an lut a, fixture a chhuah meuh chuan 'final' a intum tura beisei Atletico Madrid leh Barcelona ten final luh an inchuh a ṭul dawn.
Zanin dar 1:30-ah La Liga-a beisei phak lo pahnih Atletico Madrid leh Barcelona an inhmachhawn dawn a, Vicente Calderon-ah first leg hi an khel ang a, February 7 zanah Nou Camp-ah an inhmachhawn leh ang.
A hun lo!
Team pahnihin an khelh ṭhat lai ber an hmang lo ve ve tih hai rual a ni lo a, an league match hnuhnung pahniha point khat bak hmu thei lo team an ni. Atletico-in Deportivo Alaves chu goal khung loin an inhnehtawkpui a, Barca chuan hun tawp dawna Luis Suarez goal hmangin Real Betis chu 1-1 in an inhnehtawkpui hram - insiamṭhat mamawh lai taka inhmachhawn hi team pahnih hian an chak lo ve ve ang!
Thawnthu hlui keu let a nih chuan Barcelona hi Atletico aiin an chungnung zawk a, vawi 53 an inhmachhawn tawhah vawi 26 hnehna an chang - tun hnai match thum an inkhelhah erawh inchhuang thei zawk an awm lo. Vawi khat ve ve hnehna changin vawi khat an inhnehtawk. Barca-in an theihnghilh loh tur erawh Atletico hi season hmasaa Champions League nomawi humhim thei loa siamtu kha an ni tih hi a ni.
Champions League quarterfinal-ah inhmachhawnin Barca hian Nou Camp-ah 2-1 in hnehna chang mah se Vicente Calderon-ah 2-0 in an tlawm a, inkhel pahnih belhkhawmah 3-2 a tlawmin pet chhuah an ni - Spanish Cup nomawi an kawllai humhim an tumna kawngah Atletico an ding leh ta a, Luis Enrique-a naute tan tun hi phuba lak hun chu a ni.
Barca buaina
Barcelona-in an league match hnuhnung bera Betis an hmachhawn ṭumin Andres Iniesta leh Sergio Busquets te chu hliam vangin an chhawr thei lo a, an midfielder pawimawh pahnih hi Atletico lakah pawh an la chhawr thei dawn chuang lo - eng team tan pawh anni 'class' ang player chhawr theih loh hi channa a ni.
Luis Enrique-a'n hliam vanga an buaina hriain Marlon Santos, Alex Carbonell, Rafa Mujica leh Ignacio Abeledo te chu Barcelona B team aṭangin senior zingah training a neihtir a, Rafinha chuan training a zawm ve leh tawh bawk. Tun season-ah Barca hi an chak zawn rei berah match nga chiah an chak zawn thei a, Catalan club tiha mawi lo a ni - Atletico lakah hnehna chan ngei an tum ang.
Barca hian an tlarhmaah MSN Lionel Messi, Luis Suarez leh Neymar an nei tih erawh hriatreng a ṭul.
Atletico engtin nge?
Season ṭan tira La Liga nomawi beisei ngam Atletico Madrid hi tunah chuan champion tura dah harsa tak an ni tawh. La Liga table-ah palina niin a chung bera awm Real Madrid chu point 10-in an phak lo mek a, khelh khatin an khel tam zawk bawk.
Goal venthiam avanga hmingṭha ṭhin club hian league match 20-ah goal 16 an chhuah tawh a, an lama an khingpui ten league kal meka shot an neih tawh zat hi 206 zet a ni a, chumi awmzia chu inkhelh apiangin an lamah goal shot 10.3 awm ang a ni - defensive thiam hmingthang Diego Simeone tan luhaina tham a ni tawh. Hetihlai hian Alaves an hmachhawn
ṭuma inhliam Uruguayan centre-back Jose Gimenez chuan Barca a hmachhawn thei dawn lo.
Atletico tana innghahna ber tur erawh Antoine Griezmann a ni a, French forward hian 2016 tawp lamah beisei phak lo mah se 2017-ah siamtharna a chang leh tawh. Tun season-ah match 28 khelin goal 14 a khung tawh a, Barca tlarhnung tan a hnawksak ang.