Davis Cup khel lo tur Nadal

International Tennis Federation (ITF) buatsaih Davis Cup first round-ah Rafael Nadal a inlan thei dawn lo. Spain leh Croatia ten tun kar tawp hian ram leh ram mipa tennis team hmanga inelnaah an match hmasa ber hi an khel ang.

Spanish tlangval Na­dal-a'n 2014 French Open nomawi a chawi hnua a vawi khat nan Grand Slam final a lut leh a, Australian Open final-ah Roger Federer hneh lo mah se a khelh dan aṭangin season hmasa a hliam vanga buaina a neih chu a reh rih tih a lang chiang.

Spain captain Con­chita Martinez chuan, "Rafa hian tun hnaiah inkhel a hmachhawn hnem a, ṭha taka a inkhelh zel theih nan tunah chuan chawlh hahdam a mamawh. First round-ah a inlan thei dawn lo a, a hmun ruak luah turin Feliciano Lopez a awm thung ang. Second round kan lut a nih chuan Rafa hi kan zingah a tel ve leh thei tawh ang," tiin a sawi.

Grand Slam vawi 14 champion tawh Nadal hian Melbourne-a final khel tur khan a kalkawngah tunlai player hlauhawm ni phak Milos Raonic leh Grigor Dimitrov te a hneh a, nomawi a chawi loh chhan pawh set hnuhnung bera a service ṭum hnih a hloh vang chauh a ni.

Australian Open final chungchang sawiin Nadal chuan, "Final-ah chuan nomawi chawitu zawk awm a ngai a, khatiang ang inkhelah kha chuan chak zawk thei ve ve kan ni. Vawi tam tak a vannei zawka ka lo ṭan tawh ṭhin avangin Roger hi ka lawmpui," a ti.

French Open nomawi pakua kawl tawhtu Nadal hian clay court season an ṭan chho tur chu a phur thu leh hard court aimahin a khelh chhuah ṭhat theih zawk a beisei thu a sawi tel bawk.