England lungawi thei lo

India laka Twenty20 series match hnihnaa tlawm England chu umpire thutluknaah an lungawi thei lo a, an lungawi lohna hi he inkhela match referee Andy Pycroft hnenah an thlen tur thu England captain Eoin Morgan chuan a sawi. Cricket inelnaah umpire a hranpain an awm a, umpire thutlukna khelmual pawn lam aṭanga lo viltu match referee hi a hranin an awm leh ṭhin.

Nagpur khawpuia inkhelah hian England hian over tawpnaah chak turin run riat an la mamawh a, Indian bowler Jasprit Bumrah ball vawmah run 38 siam tawhtu Joe Root chu dik lo taka lbw pek niin Jos Buttler a out zui ve leh ta bawk si nen England hi an tlawm a ni.

Eoin Morgan chuan, "Run 40 siam tling ṭep tawh batsman chu dik lo takin lbw pek a ni a, batsman kaltluang lai an out chuan team tan a pawi thui duh em em a ni. India nen kan inkhelh leh hmain kan lungawi lohna thlen hun pek kan ni a, kan thlen ngei ang," a ti.

India leh England hian T20 series match thumna hi zanin dar 7:00-ah Bangalore khawpuiah an khel leh ang a, tun dinhmunah 1-1 niin zanin inkhela chak zawk hian series an la ang. India hian England hi test series leh ODI series-ah an hneh tawh a, England hian T20 series tal lak ngei an duh ang.