MangṬha Payet Kir tawh lo tura fapa tlanbo Payet!
"Payet kan nei, Dimitri Payet! In tan hriatthiam rual a ni lo. Super Slav-a ta a ni e, Zidane chunga leng a ni. Dimitri Payet kan nei!" tih chu season hmasa chhung zawnga London Stadium-a West Ham fan-te hla chuam a ni. Nimahsela an hmangaih, an ṭan rawn, an atchilh leh ngaihsan em em chuan Hammers tan khelmual chhunga pheikhawk inthawlh leh tawh ngai lo turin a kalsan ta si!
Player berin West Ham tan a khelh duh tawh loh thu a sawi a, Hammers-in chelh tum eng ang mah se an chelh thei tawh lo. 'Mangṭha' tih chu an fapa rangkachak ni
ṭhin tana an sawi theih chhun a ni tawh a, a club hlui Marseille-in vawi thum zet an dawr hnuah pound maktaduai 25-in an kaltir ta - Hammers hian hei aia man tam zawkin Payet hralh duh mah se an player berin West Ham tan khelh a tum tawh loh thu a sawi a, London club tan man tlem zawk pawha hralh mai chu thutlukna fing a ni.
Hmana hlimlai....
June 2015 khan West Ham hian Marseille aṭangin France ram pawn lama la khel ngai lo Payet chu pound maktaduai 10-in an lalut a, English football-a hmel thar Payet hi eng ang taka ṭha nge a nih khawvelin a la hre tam lo.
Croatian manager Slaven Bilic-a hnuaiah Payet-a'n a thiamna a pholang tak tak a, a season khatnaah Hammers tan inelna hrang hrangah goal 12 khungin assist 14 zet a nei nghal! February 2016 khan Hammers hian an player ṭha hi chan duh loin kum nga leh a chanve cham chhunzawm turin contract thar an ziahpui a, kar khata a hlawh zat chu £125,000 a ni - West Ham ang club tan chuan players pakhat kar khat hlawha heti zat insen hi tam tham tak a ni.
Payet hi season a tawp meuh chuan PFA Players' Player of the Year award dawng thei tura hming chhawpchhuah zingah a tel a, Hammer of the Year-ah thlan a ni bawk. Nipui transfer bazar-ah France international hi club lian zawkin an dawr hlauthawng takin Hammers fan-te awm mah se Payet ber hian, " West Ham-ah 100%-in ka cham dawn tih ka chiang a, he club hi ka hmangaih em avangin ka chhuahsan dawn lo tih hi Hammers fan-te hnenah ka tiam duh a ni," tiin a sawi a, West Ham fan-te hahdam takin nipui bazar-ah an awm theih phah.
Tiamthu sut hmang....
France tan vawi 32 inlana goal riat khung thei Payet-a'n nipui transfer-ah Hammers a hmangaih thu sawi mah se January 2017 a her chhuah meuh chuan a thusawi chu "West Ham tana khelh ka duh tawh lo" tih hi a ni! Payet-a'n Hammers a hmangaih thu a sawina chil per pawh a reh fel hmain chhuahsan a duh thu a sawi a, a hmangaihna hmasa Marseille lama kir a duh.
Marseille lah American sumdawng hausa Frank McCourt-a'n neitu nihna a neih tak avangin an hausa thar a, "OM Champions" Project tih duangin players ṭha ber ber lakkhawm an tum a, French player hmabak nei êng Morgan Sanson leh Manchester United defender hlui Patrice Evra lalutin an player hlui Payet lung a leng tih hriain London club lam hawiin an mit an len nghal!
Sum tam tak aiah lunglenna!
Payet hi sum duh vang hrim hrima Hammers chhuahsan a ni hran lo a, Real Madrid bakah Chinese Super League club te pawn sum tam tham tak hlawh tura an sawm midfielder hi a lung a leng a ni! London khawpui a nupuiin nuam a ti lo a, an faten an sikul nuam an tih bawk si loh avangin Marseille a kir hi a duh a ni - ropuina leh sum aiah a lunglenna a dah chungnung zawk. France international hian Hammers-ah hian kar khatah £125,000 a hlawh a, Marseille zawm turin a hlawh a ti hniam a, £100,000 a hlawh ang.
West Ham joint chairman David Sullivan chuan, "Payet hi vawi tam tak kan titi pui a, a duh chang changa a thlawna a haw theihna tur thlengin kan tiam a, a nupui pawhin London khawpui nuam a tih zawk theih nan puih kan tiam. Kan tih theih chin zawng zawng kan ti a, mah se a duh ber chu Marseille-a kir a ni si," a ti.
Sullivan chuan sawi chhunzawmin, "Payet hi hralh duh lo mah ila January thla hlawh meuh pawh lak loh a duh zawk a, hetiang chin kan thlen meuh tawh chuan club hian zahawmna venhim tur kan nei ve a ni," tiin club tana ṭha zawk ngaihtuah chunga Payet an hralh thu a sawi.
Liam mai rawh le
West Ham joint-chairman David Sullivan chuan Payet chu a player puiten team chhuahsan tura an duh tawh zawk thu a sawi! Hammers a zawm hmaa Marseille Player of the Season hi West Ham player-te hian club tan a khelh duh tawh loh thu a sawi hnu lawkah WhatsApp group aṭangin an paih chhuak!
David Sullivan chuan, "Payet hi chhuahtir duh lo mah ila team pumpui thutlukna kalhin kan kal a thiang si lo. Hun engemaw chen chhung chu a teammate-te nen an inbe tawh lo a, kil khatah ṭhuin amahin thil a ei ṭhin. A hma chuan a hlim em em ṭhin a, inkhelh hmain a ṭhiante a chibai kual a, a rilru a inthlak danglam tih hi hai rual a ni lo. A ṭhianten chhuak turin an duh a, manager-in chhuak turin a duh a, Payet chhuahtir hian team-ah inlungrualna a thlen zawk a ni," a ti.
"A khelh ṭhat ni chuan midang chunga leng a ni a, West Ham player a ni ta lo hi a pawi ka ti takzet a ni," tih chu Sullivan ṭawngkam hnuhnung a ni a, Payet hi an ui tih hai rual a ni lo.