Arsenal hmachhawn tur Sutton an hlim

FA Cup champion hnem ber Arsenal chuan fifth round-ah Sutton United an hmachhawn dawn. National League club Sutton hi an khingpui tur an hriatin lawm avangin chung lamah ban an phar!

Thawhṭanni zan khan FA Cup round of 16 inkhel tur hi pawh a ni a, champion lai Manchester United-in Blackburn Rovers an lenchilh dawn a, Chelsea chuan Liverpool pet chhuaktu Wolverhampton Wanderers an hmachhawn dawn. Premier League club pariat la dam zingah inhmachhawn tur an awm loh avangin quarterfinal-a hmuhnawm dawn a tihna a ni thei ang. Last 16 hi February 17-20 ah khelh tur a ni.

Sutton manager Paul Doswell chuan, "Lawm avangin ka zuang! Europe-a team ṭha berte zinga mi kan khelmuala an lo kal tur hi awih a har zawk hial. AFC Wimbledon kan hneh kha kan tan cup final ang a ni a, Leeds kan hneh kha European Cup final ang mai a ni tawh bawk - tun ṭuma mi erawh kan tan World Cup final a ni dawn," a ti.

Tun dinhmunah Arsenal hi Premier League table-ah pahnihna an ni a, an khingpui tur Sutton hi National League-ah 16-na niin an inkarah hian team 108 zet an awm! English football league sang ber Premier League hnuaiah Championship (24 teams) an awm a, a hnuai lamah League One (24 teams), League Two (24 teams) leh National League (24 teams) an awm.

Arsenal leh Sutton te hian 2013 pre season friendly an lo khel tawh a, Gunners 4-3 in an chak. Tun ṭum hi competitive match bikah chuan an intawn vawi khatna tur a ni. An inkhelhna tur Sutton khelmual hi Gander Green Lane niin mipui 5,013 lenna a ni a, ṭutna awm zat erawh 765 chauh a ni thung! Mipui 60,432 lenna Emirates Stadium-a inkhel tur ni se Sutton lawmna a sang zawk hial ang.

Sutton hian an squad-ah Gunners thisen kai Craig Eastmond, Roarie Deacon leh Jeffrey Monakana te an nei. FA Cup fifth round aṭanga tlak ai chuan an ngaihsan leh hmuh zen zen bik loh player ṭhate nena inkhelh theihna hun an nei tur chu an lawmin an nghakhlel takzet.

Last 16 inkhel tur pawh a nih hma hian Sutton captain Jamie Collins chuan Premier League club lian Manchester United emaw Arsenal emaw hmachhawn an chak thu a lo sawi tawh a, tunah an duhthusam a thleng dik.

Last 16 Inkhel Tur
Sutton United vs Arsenal
Blackburn Rovers vs Manchester United
Wolves vs Chelsea
Huddersfield Town vs Manchester City
Fulham vs Tottenham Hotspur
Burnley vs Lincoln City
Middlesbrough vs Oxford United
Millwall vs Derby County/Leicester City