Africa Cup of Nations Egypt hmachhawn tur Burkina Faso

Zanin dar 12:30-ah Africa Cup of Nations semifinal hmasa zawk khelh a ni dawn a, vawi sarih champion tawh Egypt leh Burkina Faso te an inhmachhawn dawn. Egypt hi a zawnin vawi thum cham­pion thei mah se kum 2010 hnuah semifinal hi an la lut leh ngai lo a, kuminah an record duhawm lo an thai bo.

Africa Cup of Nations record nei ṭha ber Egypt hian hun tawp dawn Mahmoud Kahraba goal hmangin Morocco chu kum 31 hnua a vawi khat nana hnehin quarterfinal an paltlang. Burkina Faso hian an group mtch hnuhnung berah Tunisia 2-0 in an hneh thung.

Burkina Faso leh Egypt te hi Africa Cup of Nations bikah chuan kum 1998 khan semifinal-ah bawk an lo inhmachhawn tawh a, Egypt hian 2-0 a hnehna changin final an lut a, an champion zui bawk. Kum 2000 khan group stage-ah intawng lehin Egypt 4-2 in an chak leh, tun ṭumah pawh hian chak zawk tura rinkai an ni.

Egypt hian semifinal vawi 12 an khelhna tur a ni a, tun hmain vawi sarih hnehna chang tawhin ṭum li a chak lo zawkah an lo ṭang tawh. Burkina Faso erawhin final vawi khat an lut tawh a, sefimifinal an vawi thum khelhna tur chuah a la ni thung.

Ram pahnihte inkhel hian ngaih­ven hlawhna chhan pakhat a neih chu goal khung thiam leh ven thiam an nih vang a ni. Egypt hian semifinal thleng khan goal an la chhuah miah lo a, anni chiah hi an lama goal la lut lo awmchhun an ni. Hetihlai hian Burkina Faso hian match li an khelh tawh aṭangin inkhelh apiangah goal an khung vek thung.