A hun takah Brandon

RG Stadium-a Aizawl FC vawi hnih chak puitu Mah­moud al Amna chu minute 18-na lekah lakchhuah a ni a, inhliam vang thoin Lalruatthara leh R. Laldan­mawia te lak chhuah a ṭul bawk. Mizo club-in chhantu an ngai a, mamawh chhanna chu substitute Brandon VL Remdika a ni. Hunthar tlangval hian minute 89-naah DSK Shivajians lakah chakna goal a khung - 1-0 in an chak.

Khalid Jamil-a hoten Mualpuia match thum an khelh tawhah hnehna an chang vek a, khualmuala match thum an khelh aṭanga point li an sual chhuah bawk avangin Mizo club-in point 13 hmuin table-ah pathumna dinhmun an sawh nghet.

Mizo pali ve ve
DSK Shivajians inkhel bul ṭantu zingah Jerry Lal­rin­zuala, Sairuatkima, Jer­ry Mawihmingthanga leh Lallianzuala Chhangte te an awm a, Aizawl FC-a Mizo bul ṭantu zat nen a inang chiah. MPL club tan hian Zohmingliana Ralte, Lalruatthara, R. Laldanmawia leh H. Lalmuankima ten bul an ṭan.

AFC lamah ni danga bul ṭan ṭhang Albert Zohmingmawia leh Lalrinzuala Khiangte chawlh hahdamtir an ni.

A hmuhnawm loh
Aizawl FC-in fimkhur takin bul an ṭan a, DSK Shiva­jians pawh chuti bawk.

Dave Rogers-a'n defence pali pui turin midfielder Sairuatkima a pawt let a, defender panga an ni ber a, a su tlang tur khawpin Aizawl FC goal nawr a na lo.

Tlar hma lama Mizo club harsatna belhchhah turin Al Amna chu minute 18-na lekah lakchhuah a ni a, Minerva Punjab leh Shillong Lajong an hmachhawn ṭuma man of the match Syrian midfielder tel lo pawhin Aizawl FC an chungnung zawk tho.

Amaherawhchu AFC hian goal chance an insiam thei lo a, goal zawnah vawi khat chiah an pet a, an pet chhun lah DSK keeper Soram Poirei tan dan harsa a ni lo.

First half-ah DSK-a Mizo player beiseiawm Jerry Mawia leh Lianzuala te an che fuh tawk lo a, second half ṭantirhah lakchhuah an ni.

Coach Rogers erawhin, "Tactical thil vanga la chhuak ka ni a, an khelh danah ka chhuang em em a ni," tiin inkhelh banah a sawi thung.

A hmawr bawkna a pawimawh
English coach Dave Rogers hian Royal Wahing­doh midfielder hlui Seityasen Singh leh Irish midfielder Shane McFau-te a luhtir a, na zawka nawr a tum a tih a chiang. Aizawl FC-in second half ṭan ṭha hret mah se Ruatthara leh Danmawia te inhliam vanga lakchhuah an ṭul avangin darkar khat pawh tling loah Khalid-a'n substitution a hmang zo der a, DSK player palian karah an talbuai bawk.

DSK goal bawh a na a, Jerry Rinzuala chu goal nawrna kawnga player pawimawh a ni. Bethlehem Veng rawlthar Jerry hian goal a khung teuh a, Mizo tlangval Sairuata'n midfield hna a chelh hnuah pawh defence laia a awm lai ang thoin a ṭangkai. Substitute Holicha­ran Narzary-a'n chance ṭha a hlah bakah Seityasen goal khung tur Albino-a'n a dang.

Aizawl FC dinhmun chhe mah se player-te hun tawp thlengin an ṭang a, Pune khaw club laka point hloh an tum lo. Second half-a khel ṭha Jayesh Rane cross ball chu Kamo-a'n Brandon-a goal khung turin a dang per a, Hunthar tlangval hian goal len puar pawpin a pet goal. DSK tan sutna hun a awm tawh lo.

Eng nge an sawi?
Khalid Jamil chuan, "Amna tel loa kan chak hi a lawmawm a, Amna chu awm se kha ai hma kan chak ang. Brandon a khel ṭha a, amah aia lian zawk hmaah khan a zam lo. Player pumpui thawhrah a ni a, kan result-ah kan lawm a, min ṭantute chungah kan lawm bawk," tiin a sawi.

DSK Shivajians coach Dave Rogers chuan, "Kan khel ṭha lo ve ve a, chak kan phu lo ve ve. Hun tawpa kan fimkhur lo erawh inzir belhna tur kan neihna lai niin ka hria. Khatiang huna kan tihsual chuan chak ngaihna a awm lo. Ka team-a Mizo player-te khelh danah ka lawm a, ka naute ka chhuang a, Mizo mipuite thlirna hnuaia inkhelh hi nuam ka ti," tiin Mizote nena inzawmna an neih ṭhat thu a sawi.

Aizawl FC hian Inrinni hian Kolkata-ah Mohun Bagan an hmachhawn ang a, RG Stadium-a an inkhelh lehna hmasak ber tur chu February 10 niin Churchill Brothers an hmachhawn ang. DSK hian Pathianni hian an mualah champion lai Bengaluru an mikhual ve thung ang.