AFC Champions League Bengaluru an tla nghal

I League champion Benga­luru FC tan AFC Champions League-ah beisei tur a awm tawh lo - Bangalore club hian Thawhlehni zan khan Al-Wehdat SC chu khualmualah lenchilhin 2-1 in an tlawm a, preliminary round inelnaah hian second leg a awm loh avangin Albert Roca naute hi AFC Cup-ah an lungawi a ṭul dawn a ni.

Jordan Premier League champion tan Ahmad Maher leh Baha’ Faisal ten goal an khung a, South Indian club tan Sunil Chhetri chuan goal khat sut ve mah se goal dang an chhuah chhunzawm loh avangin Bengaluru hi lawm tur an ni. I League champion tan North Mualcheng tlangval SenaRalte chuan inkhel bul a ṭan a, Chaltlang rawlthar Malsawmzuala chu bench-ah dah ni mah se tlan luhtir a ni lo thung.

I League champion-in AFC Champions League preliminary round an khel ṭhin a, hnehna an chan chuan playoff round khel lehin an chak chuan group stage an lut ve chauh ṭhin. Nikum khan Mohun Bagan chu Champions League preliminary-a Indian club chak hmasa ber niin Tampine Rovers an hneh a, playoff-ah Shandong Luneng an hneh loh avangin group stage erawh an thleng phak bik chuang lo.

Bengaluru hian AFC Cham­pions League an beisei theih tak lohah chuan AFC Cup Group E-ah Maziya (Maldives) leh Abahani Limited (Bangladesh) te nen an awm ho ang a, preliminary round khel mek Thimpu (Bhutan), Valencia (Maldives) Mohun Bagan (India) leh Colombo (Sri Lanka) zinga pakhat hian an zawm ve leh bawk ang. Bagan hian preliminary zawha playoff an paltlang a nih chuan AFC Cup group khatah Indian club pahnih an awm dawn tihna a ni.