Vawiin Mizoram inlan hun

31st Captain NM Gupta Trophy semif­inal-ah Mizoramin vawiin tlai dar 5:00 hian ASEB, Guwahati an hmachhawn dawn a; chawhnu dar 2:00-ah Army Green leh ARC, Shillong ten final luh an inchuh bawk ang.

SM Dev Stadium, Silchar-a neih mek NM Gupta Football hi Mizoramin Santosh Trophy final round inpuahchahna atan an hmang a, inelna hi India ram pum huap pawha inelna lar ṭhin a ni.

Champion team pawisa dawn tur zat chu cheng nuai nga a ni a, pahnihnain nuai hnih an dawng ang. Semifinal-a chak lo zawk hian Rs 50,000 an dawng dawn a, hei vang hian vawiin inkhel hi Rs 1,50,000 inelnaah a ngaih theih ang.

A zawnin vawi 7?

MPL5-a Chanmari FC champion pui­tu Lalsangzuala Hmar-in a vawi khat nan Mizoram team chu Santosh Trophy-ah a kaihhruai a, January thlatir khan Shillong-ah qualifier neih niin Tripura leh Manipur hnehin final round an thleng.

Sanga hnuaiah Mizoram hian NM Gupta Football an khel leh nghal a, group stage-ah an khingpui ARC (Shillong), Arunachal SS (Tripura), ASC (Bangalore) leh Assam Rifles (Shillong) te hneh vekin Santosh Trophy qualifier nena chhiar zawmin match zawnin vawi ruk an chak tawh.

Mizoram hian match ruk an khelhah hian goal 20 an khung a, goal thum chiah an chhuah. Silchar-a inelna bikah goal 12 an khung a, goal hnih an chhuah a, Sanga hnuaia an result hi a chhuanawm hle.

Mizoram hian match sarih chak zawn turin ASEB an hneh a ṭul dawn a, Guwahati club hi Group A pahnihna ni mah se tun inelnaa hneh loh tawng lo an ni.

Manager thukhawchang

Mizoram manager Lalzawmliana chuan, "ASEB leh Army Green te hi kan group lama kan hmachhawn ai khan an ṭha hretin ka hria. ASEB khelh dan hi Mizo ang tho an ni a, an huaisen a, an goal bawh a na bawk. Player an inrual khai avangin khelhpui an harsa dawn a, chutihrualin group hmahruaitu kan ni a, team ṭha zawkah chuan ka inngai. Tlai lama inkhel tur kan ni a, Mizo ṭantu pawh kan neih ṭhat ngei kan beisei bawk," tiin final kalkawng a harsat tur thu a sawi.

Mizoram hian inhliam vangin Mizoram Police forward Lalsangbera an chhawr thei dawn lo a, Chanmari FC midfielder pahnih Lalmuanzova leh Lalram­mawia te an dam chiang lo bawk. Amaherawhchu semifinal aṭanga chhawr theih turin Lalrinchhana a awm dawn a, Chanmari FC midfielder Rinchhana hi coach Sanga'n Bethlehem Vengthlang FC a enkawl aṭang tawha a hman thiam a ni.

Semifinal-ah ARC

ARC, Shillong-in semifinal hmun­ ruak pakhat hnawhkhat turin Thawhlehni tlai khan ASC, Bangalore 5-0 in an sawp a, Silchar club Arunachal SS an tlak phah.

Shillong-a innghat ARC hian semi­final hmasa zawkah Army Green an hmachhawn dawn. Durand Cup champion Army Green hi team ṭha zawka ngaih an ni mah se ARC hi dah bo nghal ngawt a thiang lo.

Semifinal
Vawiin Inkhel Tur
2:00 PM Army Green Vs ARC, Shillong
5:00 PM Mizoram Vs ASEB, Guwahati