Arsenal veltu Watford

Premier League nomawi chawi tum Arsenal chu an Emirates Stadium-ah Watford-in 2-1 in an hneh - kum 1988 hnua Arsenal an hneh lehna hmasa ber a ni.

Gunners hian hmahruaitu Chelsea hnaih theihna hun ṭha an bawhpelh miau avangin league table-ah pathumnaah awmin Blues an phak lohna chu point kua a ni ta - inkhelh hmabak 15 a la awm.

Thawhlehni zan Emirates Stadium-a inkhelah minute 10-na leka Tottenham defender hlui Younes Kaboul freekick pet chu Aaron Ramsey-a'n an mahni lamah a dang pial lut.

Goal hmahruai luh aṭanga minute hnih leh second 57 hnuah Troy Deeney chuan an goal hnihna a khung bawk. Gunners tan Alex Iwobi-a'n second half-ah goal khat khung ve mah se Arsene Wenger-a nauten goal dang an nei thei tawh lo.

Arsenal an buai

Hrem a nih avangin Wenger-a'n a naute a ho thei lo a, mipui ṭhutna aṭangin inkhel a en.

Midfielder Santi Cazorla hliam a la dam lo a, Granit Xhaka chu hrem a ni bawk. Inkhel khaikhawm tura lut Ramsey-a'n an lamah a dang lut, khawih pial lo se Petr Cech tan dan theih tura ngaih a ni.

Right back Hector Bellerin chu bench-ah ṭhuttir a ni a, Gabriel Paulista-a'n beisei a phak lo. Brazillian defender hian ball a theh uluk tawk loh avangin Ramsey tan lak phak a ni lo a, ball latu Etienne Capoue pet chu Cech-a'n dan sak mah se a per nang fuhtu Deeney pet erawh a dang hman tawh lo.

Gunners keeper Cech-a'n Daryl Janmaat goal khung tur ropui takin a dan sak a, Sebastian Prodl ball tauh chu crossbar chungah chiah kalin goal an chhuah belh loh avangin North London club an vannei!

Welsh midfielder Ramsey hi minute 20-na lekah hliam vangin Alex Oxlade-Chamberlain-a'n a thlak a, Francis Coquelin aiah Lucas Perez a lut bawk. Arsenal-in ball keng thei leh sem thei an nei lo a, khelmual laiah tharum hman a ngaih huna hmang thei an tlachham bawk.

Hetih lai hian Watford central midfielder Capoue chuan tackle vawi sarih a neihah ball a chang vek a, goal nawr leh venhim kawngah player pawimawh a ni - FA Cup aṭanga tla hlim leh a zawna league match sarih chhung hnehna chang tawh lo Watford-in hnehna a chan theih nana player langsar a ni.

Eng nge an sawi?

Wenger chuan, "Kan hriam tawk lo a, chutih rualin kan goal hmasa zawk kha chu vanduai vang a ni. Nomawi inchuh kawngah kan rilru a inpeih tawk lo niin a lang a, second half kan khelh danah erawh lawmna tur a awm," tiin a sawi.

Gunners hian inkhel bul an ṭan ṭha lo takzet a, minute 45 chhungin Watford goal zawnah an pet miah lo.

Alexis Sanchez-a'n a pass sual nasa a, goal an khung theih nana a ball vawrh luh erawh Iwobi tan goal khung loh chu tih theih dang a awm lo - Chilean forward cross ball hi a ṭha takzet.

Watford boss Walter Mazzarri chuan, "First half-ah ropui takin kan khel a, ka player ṭhenkhatten an theihna san zia an pholang. Chawlhlawk hnuah na takin min nawr chung­in inkhel pumpui thlirin kan khel ṭha hle tih a ni," a ti.

Mazzarri chuan, "Team lian tak an khel­mualah kan kal chilh a nih chuan ball chan hnem a har a, chutih rualin na taka kan nawr ngam ve a pawimawh. Minute 90 chhung ṭha taka khelh duh mah ila a harsa a, kan tum ang taka point thum kan hmuh vang erawh chuan lawmna tur hlir a ni," tiin a sawi.

Hmabak

Arsenal hian Inrinni zanah Chelsea hmachhawn turin Stamford Bridge an pan dawn, season chawhma lama 3-0 a an lo hneh tawh lakah chak loh a thiang lo ang. Point 27 hmua league table-a 13-na ni mek Watford hian Burnley an mikhual thung ang.