Premier League nomawi beiseina a la nung ; Anfield-ah chak zawk an awm lo

Anfield-a match thum zet a zawna an tlawm hnuah Liverpool chu an tlawm duh tawh bik lo - Thawhlehni zan khan an mikhual Chelsea nen 1-1 in an inhnehtawk. Premier League nomawi beiseina a la mit lo.

Anfield-ah David Luiz free kick pet luh hmangin mikhual team au hmasa zawk mah se, Liverpool tan Georginio Wijnaldum chuan an si phurh sutin Anfield a nghawr nghing.

Reds tan point khat hlawh chhuak turin Simon Mignolet-a'n Diego Costa penalty pet a dan ngai mah se khel ṭha zawk chu Jurgen Klopp-a naute an ni. Chelsea hian khualmualah point hnih an hloh ni loin point khat an hlawh chhuak a ni zawk. Blues hi Premier League table chung berah an awm chhunzawm zel a, palina Liverpool nena an inthlauhna chu point 10 a ni.

A la ngai reng e

October 2015-a Liverpool a zawm hnuah Jurgen Klopp-a'n Anfield-a a kar duhawm lo ber a hmang a, Premier League-a Swansea City an ngam loh bakah EFL Cup semifinal aṭangin Southampton-in an pet chhuak a, FA Cup fourth round aṭangin Wolverhampton Wanderers chuan an hnawt chhuak bawk.

Season ṭantira team hmuhnawm Reds hian Klopp hnuaia an game rang leh hmuhnawm kha an theihnghilh ta em ni tih chu zawhna a ni a, Thawhlehni zanah chhânna pek a ni.

Chelsea boss Antonio Conte-a'n inkhelh ṭan hmain sapui hliam tuar an hmachhawn tur thu a sawi a, a thusawi dikna hmutu chu Italian manager hi a ni. Anfield-ah Klopp-a nauten goal chhuah hmasa zawk mah se inkhel an thunun tluan chhuak zak a, inkhel pumpuia an ball chan zat hi 62% niin an goal chhuah dana dem tur awmchhun chu Simon Mignolet a ni. Minute 24-naa David Luiz-a free kick pet dang turin Belgian keeper hi a inring hman lo.

Mahse, kum 28-a upa keeper hian a chetsual hnual phah nan a hmang lo a, second half-ah Diego Costa penalty pet chu ṭha zetin a dang - hmingchhiatna thai rehin Reds a chhanhim. Liverpool-in point thum an hmuh loh chhana dem tur an zawng dawn a nih chuan Roberto Firmino a langsar ber a, Brazilian forward hian goal ruaka a khung loh bakah hun tawp dawna a hun ṭha neih chu Thibaut Courtois-a tana awlsam taka man theih turin a tauh. Liverpool lawmna belhchhah tur chu minute 75-naah Sadio Mane a tlan lut a, Senegalese forward hoin Reds hi team ṭha zawk an ni leh tawh ang.

Conte a hlim

Chelsea tan striker chhuanvawr Costa-a'n penalty a pet goal lo a, Blues-in chak theihna remchang an neih an chhawr lo hi Antonio Conte-a'n a ui tih hai rual a ni lo. Mahse, inkhelh tawp rualin Conte hian anmahni ṭantute lam hawi zawnga kut pharin a au a, Anfield-a point khat hlawhchhuah hlutzia a hai lo.

Blues-in an khelh ṭhat dan berin an khel lo tih a chiang a, mah se 'champion zia' erawh hmuh tur a awm thung. London club hian an khelh ṭhat loh niah pawh an elpui lakah point khat an hlawh chhuak thei a, point an hloh zanah meuh pawh anmahni hnaihtu Arsenal leh Tottenham Hotspur an tlawm lehzel avangin an thiamna leh thluak piahah 'vanneihna' chu an lam ṭang ang mai a ni - hei hi a ni 'champion zia' tia an sawi ṭhin kha.

Mikhual team tan ṭum dang ang bawkin N'Golo Kante chu an player langsar a ni a, season hmasaa Leicester City champion puitu midfielder hian ball an chang tlem zawk tih hrechungin a thawkrim takzet a, second half-a Eden Hazard thlaktu Pedro thiamna hmuh hmaih theih a ni lo bawk.

Eng nge an sawi?

Liverpool manager Jurgen Klopp chuan, "Hnehna kan chan loh zawn avang khan engkim hi a chhe ta duai a ni lo a, kan rilru huaisen zia pawh ka sawi ṭhin. Mahse, he ka thusawi hi mi tam takin an pawm lo a, mah se he club ropui leh lian tak hian a dinna a sawh sawn thiang lo. Kan theihtawp kan chhuah chhunzawm zel ang a, season tawpah eng nge kan thlen chin chu kan hria ang. Zanin kan result-ah ka lawm a, theihtawp chhuahin kan bei chhunzawm zel ang," a ti.

German coach hian Liverpool a enkawl hnuah Arsenal, Chelsea, Manchester City, Manchester United leh Tottenham te hi league match 15 zet a khelhpui tawh a, vawi ruk hnehna changin vawi riat a inhnehtawkpui a, vawi khat chiah tlawmin season hmasa khan Manchester United chu Anfield-ah a ngam lo.

Chelsea manager Antonio Conte chuan, "Team pahnihin innawr kan tum ve ve avangin a harsa a ni. Liverpool kan hneh loh ṭum nena khaikhin khan kan khel ṭha zawk a, chuvang chuan ka lawm a ni. Costa penalty kha Mignolet khan ṭha em emin a dang a, kha lo pawh kha chance dang kan nei nual a ni. Mahse, khualmuala Liverpool tum hi thil hautak a nih avangin kan result-ah hian kan lawm tur a ni," tiin a naute khelh danah a lungawi.

Spurs an tawlhthlu

Champion tum Tottenham-in Chelsea nena an inkar tizim turin hun ṭha nei mah se Sunderland lakah an hun ṭha neih an chhawr thei lo a, 73% ball chang chungin khualmualah goal khung loin an inhnehtawk.

Spurs tana an hun ṭha neih chu Victor Wanyama-a'n engmah lo maiah a chantir a, Black Cats tan Fabio Borini chuan hming chherna remchang a neih a chhawr lo bawk.

Premier League champion Leicester City-in beisei an phak lo chhunzawm zel a, khualmualah Burnley chu 0-1 in an ngam lo.

He inkhela goal awm chhun hi Sam Vokes-a'n minute 87-naa a khung a ni a, goal a khung hmain Welsh striker kut hi ball-in per mah se referee-in a hmu tlat lo.

Burnley hian Premier League-ah match nga chhung an khelmualah a zawnin chak hmel an hmu tawh a, Claudio Ranieri-a nauten khualmuala league match an khelhah tun season-ah chak hmel an la hmu lo thung.