English football transfer a tawp ; Premier League-in hlawkna an tel
English football-a January transfer chu Thawhlehni zan khan a tawp. Premier League club ten players lakluh nan pound maktaduai 215 zet seng mah se, a vawi khat nan thlasik transfer bazar-ah hlawkna an tel.
Finance analysts Deloitte chuan Premier League club-te transfer hi zirchiangin an thehchhuah pound maktaduai 215 aia players hralhna aṭanga an sum lakluh tam zawkna hi pound maktaduai 40 zet a ni.
Transfer tawp niah Southampton leh Burnley an che na a, Saints hian Napoli striker Manolo Gabbiadini lalut tura pound maktaduai 14 zet an sen laiin Clarets hian an club player manto ber ni turin Robbie Brady chu Norwich City aṭangin pound maktaduai 13 zetin an lalut thung. Transfer tawp zana Premier League chhuahsan langsar ber chu Odion Ighalo a ni a, Watford striker hian pound maktaduai 20 zetin China lam a pan.
Premier League club te hian nipui transfer-a an sum sen zat nena chhutin pound tluklehdingawn 1.38 zet an seng ta a, transfer-a Premier League-in sum an sen hnem ber ṭum a ni. Thlasik transfer bikah January 2017 hi an sen hnem ber dawttu a ni a, January 2011 khan Premier League hian January transfer-ah ngawt pound maktaduai 225 sengin kumina sen zat aia a sanna hi pound maktaduai 10 a ni.
Transfer tawp ni thil thleng
Watford striker Ighalo chuan Chinese Super League club Changchun Yatai a pan a, pound maktaduai 20 man striker hian kar khatah £200,000 dawn a hlawh dawn nia tarlan a ni. Nigerian striker hian kum 2015 chhung khan match 38-a inlanah goal 30 khung mah 2015 liam hnuah goal ruk chauh a khung tawh.
Burnley chuan pound maktaduai 13 man Republic of Ireland international Brady chu kum thum leh a chanve chhung an hnena cham tura an lakluh bakah Aston Villa aṭangin midfielder Ashley Westwood an lalut bawk a, a man zat tarlan a ni lo.
Southampton-in tlarhma ti chak tura Italy tana vawi ruk inlan tawh Gabbiadini an lakluh laiin Crystal Palace chuan Jurgen Klopp-a nena inhmuthiam lo Liverpool centre-back Mamadou Sakho chu season tawp thleng atan loan-in an lalut thung a, Greek club Olympiakos aṭangin midfielder Luka Milivojevic an lalut bawk.
Swansea City chuan Aston Villa chu defender Neil Taylor leh forward Jordan Ayew an inthlengpui bawk. Sunderland-in transfer bazar-ah an beisei an hmu lo thung a, Leicester City chuan forward Leonardo Ulloa lakluh an dilna chu an hnawl sak bakah Saints chuan pound maktaduai 12-a Jay Rodriguez an dawrna chu an hnar sak.
Players manto
January transfer-a Premier League players chhuak zingah Oscar chu manto ber a ni a, Chelsea midfielder hlui hian pound maktaduai 60 zetin Chinese Super League club Shanghai SIPG a zawm. Thlasik transfer laia thawm nei ring ber Dimitri Payet chuan pound maktaduai 25-in Marseille a pan a, Oscar dawta players hralhchhuah to ber a ni - player pahnih man zat inthlauhna hi pound maktaduai 35 zet a ni thung.
Everton chu Premier League club zinga player pakhat tana sum hmang hnem ber an ni a, Merseyside club hian Manchester United aṭanga Morgan Schneiderlin lakluh nan pound maktaduai 22 theh chhuakin France midfielder hi player manto pathumna a ni bawk. China ram lam pana kal chhuak pound maktaduai 20 man Ighalo chu thlasik transfer-a Premier League player manto lamah palina a ni.
Cristiano Ronaldo thlak tur ang hiala sawi Memphis Depay-a'n France lam hawiin a puanthuah a tel a, Dutch winger hian Olympique Lyon chu pound maktaduai 16-in a pan. Leicester City-in khelmual chhungah beisei phak lo mah se transfer-ah sum an ren phah chuang lo a, Belgian club Genk aṭanga defensive midfielder Wilfred Ndidi lakluh nan pound maktaduai 15 an theh chhuak.