Adebayor-a'n Turkey a pan

Club nei loa awm mek Emmanuel Adebayor chuan, Turkish club Istanbul Basaksehir chu thla 18 chhung châm turin a zawm. Kum 32-a upa striker hian nikum nipui laia Crystal Palace a chhuahsan hnuah club a nei lawk lo a ni.

Arsenal leh Man­chester City striker hlui hian club a nei lo chungin African Cup of Nations-ah an ram Togo aiawhin a feh chhuak tho a, mah se knockout stage lut zo loin Group C mawngphahah an awm.

Turkish Super Lig table-a pahnihna dinhmun luah mek Istanbul Ba­saksehir director Mustafa Erogut chuan, "Adebayor hi players kan lakluh duh zingah a tir aṭangin kan dah sa a, kan club thil tum leh hmabak te hrilhfiah a nih hnuah kan zinga tel a duh avangin amah leh club-in he transfer hi kan hlawkpui ang tih kan ring tlat a ni," tiin an striker thar chungchang a sawi.