Hmun ruak inchuh tur Cameroon vs Ghana

Zanin dar 12:30 hian Stade de Franceville, Gabon-ah Afri­ca Cup of Nations semifinal hnu­hnung zawk khelh tur a ni a, Cameroon chuan kum 2008 hnua a vawi khat nana final lut turin Ghana an paltlang a ngai dawn.

Africa Cup of Nations hi kum 1957 aṭang khan khelh ṭan a ni a, zanina semifinal-a intawng tur Ghana leh Cameroon te hian inelna neih ṭan a nih aṭanga a hmasa pahnih nomawi an insem a, hemi hnuah vawi thum ve ve an champion leh tawh.

Vawi sarih champion tawh Egypt tih lohah chuan Ghana leh Cameroon te hi record nei ṭha ram an ni a, kuminah an ropuina belhchhah theihna hun ṭha an nei a, bawhpelh an tum lo ve ve khawp ang.

Ram pahnihte hi 2008 Africa cup semifinal-ah khan an lo intawng tawh a, inelna thlengtu Ghana hi si khat faiin an chak lo. Ghana hian an intawn hnuhnung pathumah chak ni hmel an hmu miah lo a, vawi khat tlawmin vawi hnih dang chu an inhnehtawk.

Cameroon hian quarterfinal-ah inkhel hautak an hmachhawn a, Senegal nen hun pangngaiah goal awm loa an inhnehtawk hnuah penalty shoot out-ah 5-4 in hnehna an chang. He mi ṭum hian African zinga player man to ber Sadio Mane chuan Senegal tan penalty a pet goal lo.

Cameroon coach Hugo Broos chuan, "Ka naute hi kum naupang te te awmkhawm an ni a, an tumruhna leh huaisenna erawh fak an phu. Tun tournament-ah hian kan khelh ṭhat bakah kan vannei em em a, ka player 14 zet hi Africa Cup of Nations an vawi khat khelhna a ni a, kan thlen chinah lawm tawh viau mah ila final luh ngei kan tum," tiin a sawi.

Group stage-ah Cameroon hian match thum an khelh aṭangin chak loh an nei lo a, vawi khat hnehna changin match hnih dang an inhnehtawk. Goal thum khungin an lamah goal hnih a lut thung a, Group A-ah Burkina Faso nen point nga hmuin group hmahruaitu an nih loh chhan chu goal khata an khung tlem zawk vang chauh a ni.

Ghana hian hliam vangin an captain Asamoah Gyan an chhawr thei dawn lo, khaw­thlang thuthar thehdarhtu

ṭhenkhat chuan kum 31-a upa forward hi khel thei tur angin an sawi thung. Ghana hian Gyan an chhawr thei lo a nih pawhin Ayew unau an la neih avangin lungngaihna tur a awm lo ang. Jordan Ayew leh Andre Ayew te hian semifinal-ah goal khat ve ve khungin DR Congo 2-1 in an hneh.

Ghana hian a zawnin vawi ruk zet Africa Cup of Nations semifinal an khelhna tur a ni a, vawi li an champion tawhna inelnaah hian an hlawhtlin hnuhnun ber chu 1982 daih tawh kha a nih avangin kumina hian tlang an tum ruh tawh hle ang.

Ghana coach Avram Grant chuan, "Cameroon hian Senegal an hneh lai kha kan hmu ve a, team ṭha tak an ni. Inkhel hautak a ni dawn chiang a, keni aiin ni khatin hahchawlhna hun an neih tam bawk avangin kan thawhrim a ngai dawn. Kan khingpui tur hi team ṭha tak ni mah se kan tan zamna chhan tur a awm lo thung, ka naute hian nitin hma an sawn zel a, a bik takin tlarhma lamah a tir ai khan kan hriam tawh hle," tiin a sawi.