Saina a hmanhmawh lo

Saina Nehwal chuan a hliam dam tawh mah se ranking lama invawrh chho tura inkhelh tam nghal vak kher a loh loh thu leh zawimuanga hmasawn a tum thu a sawi chhuak.

Kum 26-a upa Saina hian nikuma Australian Open a chawi hnua a vawi khat nan Malaysia Masters-ah a champion a, Rio Olympic-a a khup hliam zai a nih hnuah tunhnaiah beisei angin a khel chhuakleh tawh. Kar hmasa khan Syed Modi International tournament-ah inlan tur ni mah se a inhnukdawk a, tuna a tum ber pakhat chu march thla a khelh tur All England Badminton Championship-a inlan a ni.

London Olympic bronze medalist Saina chuan, "Malaysia-ah khan ka inkhel zawng zawngah game hnih hmangin hneh­na ka chang vek a, awl­sam taka nomawi chawi angin lang mah ila inkhel hautak tak tak a ni hlawm. Ka khup hliam a dam chiang tawh a, chutih rualin inkheh theihna zawng zawnga inlan erawh a ṭha ber lo ang, a pawimawh hmasa chu All England Badminton Championship a ni," tiin a sawi.

World number 1 hlui hian sawi chhunzawmin, "Ka tum ber pakhat chu hliam nei lo tura inkhelh a ni a, pumpelh theih ni lo mah se inhliamna tam tak hi chu ven theih a ni. Chuvangin ka tan fimkhur a ngai," a ti.

Indian shuttler hian PV Sindhu-i'n tun hnaia hma a sawn nasat thu leh khawvela player beiseiawm berte zinga mi a nih thu a sawi chhuak bawk. Saina hian Premier Badminton League (PBL) inkhel pawimawhah khan Sindhu hi a hneh lo.