Federer champion kha a ṭha - Djokovic

Novak Djokovic chuan Roger Federer-a'n Australian Open nomawi a chawi leh thei chuan a barakhaih loh thu a sawi a, Swiss tlangvalin hnehna a chang leh kha tennis hmasawn nan a pawimawh thu a sawi tel bawk.

Season khat chhunga Grand Slam hmasa ber Australian Open-ah Federer-a'n a elpui ber Rafael Nadal hnehin a vawi 18 nan major title a la a, Melbourne-a vawi ruk champion tawh Djokovic erawh Denis Istomin hneh loin second round-ah a tla thung.

Serbian tlangval Djokovic chuan, "Federer champion kha mak ka ti lo, ani hi chu a dam ṭha a nih phawt chuan khawvela a ṭha ber angin a khel thei reng a ni. Thla ruk a chawlh hnuah a lo kir hlim a ni a, a kawng zawh kha a ropui tak zet," a ti.

Grand slam vawi 12 champion tawh Djokovic chuan sawi chhunzawmin, "Nadal nen final an khel kha duhthusam a ni a, anni pahnih hian tennis a inelna ropui ber chu an siam a ni. Court chhungah khan player naupangzawkte tana entawn tur tam tak an hnutchhiah a, ṭhangthar lo awm zel turte tan final-a an inkhel en theih kha a hlawh thlak hle ang tih a chiang," tiin a sawi.

World number 2 Djokovic hi kartawpa Serbia leh Russia ten Davis Cup first round an khelhturah singles match a khel ang.