City an tawlhthlu; Reds quadruple beiseina a nung!

Football mawina hmuhtirin kan awm leh ta - West Ham chuan Premier League champion ni tawh mai tura tam takin an ngaih Manchester City an chelh a, 2-2 in an inhnehtawk.

West Ham tan Jarrod Bowen chuan goal hnih a khung a, 2-0 in a team hma a hruaipui. Mahse, Jack Grealish leh Vladmir Coufal (own goal) ten City si phurh an sut a, Riyad Mahrez chuan penalty a hlah thung!

Hammers-in City an chelh avangin Premier League nomawi inchuh boruak a nung leh ta sawt a, Liverpool hian zanin dar 12:15-ah Southampton an hneh chuan point khat chauhin City an thlau tawh dawn.

May 22, zan dar 8:30-ah City leh Liverpool hian an league match tawp ber an khel dawn - City-in Reds legend Steven Gerrard a enkawl Aston Villa an mikhual ang a, Liverpool-in Wolverhampton Wanderers an mikhual thung ang.

Welcome to Bowen
City-in chak inring chungin Hammers khelmual an pan a, mahse, first half-ah Jarrod Bowen-a 'show' an va thlir - City fans an nguai a, Hammers fans ai maha lo lawm chu Liverpool fans an ni.

Kum 25 mi Bowen hian Pablo Fornals-a ball thlawh luh chu minute 24-naah chak zetin a um lut a, City keeper Ederson thlenga a tlanpel hnuah chiang zetin goal hmahruai a khung.

English forward hian a duhtawk mai lo - England tana inlan a phu tih minute 45-naah a pholang nawn a, Michail Antonio-a siamsak chu ṭha tak bawkin an goal hnihna ni turin a chhuih lut.

Bowen-a'n tun season inelna hrang hrang match 50-a goal 18 a khungna chiah a ni a, Three Lions jersey hak a phu tih inhrilh nawn a ngai lo.

City an tho teuh!
Champion beisei City-in rin loh takin goal hnih an chhuah a, second half-ah an insiamṭha. Pound maktaduai 100 man Grealish-a'n second half ṭan aṭanga minute linaah a volley goal a, 2-1 a ni.

Pep-a nauten champion an duh a, tlawm an tum lo. Minute 69-naah si phurh an sut zo - goal khungtu erawh Hammers defender Coufal a ni. Mahrez-a freekick naran tak chu lo tauh chhuah a tum a, an lamah a tauh goal daih!

City an phur thar a, hun tawp nan minute li chauh a awm tawh tihah penalty an hlawh chhuak zui. Manchester khaw club tan Mahrez a lo pen chhuak a, mahse, Algerian forward pet hi Lukasz Fabianski chuan ṭha zetin a lo dansak.

Manchester City-in 78% zet ball an chang a, vawi 31 ngawt shot an nei - mahse, West Ham aiin goal an khung tam thei bik chuang lo a, draw result-ah lungawi an zir.

Kawng a inhawng
City an chak zo lo a, Liverpool tan kawng a inhawng zau sawt - Jurgen Klopp-a team hian League Cup leh FA Cup-ah champion nomawi an chawi tawh a, Premier League leh Champions League an la hmabak.

Zaninah Saints an hneh theih chuan point khat lekin City an thlau dawn a, Champions League-ah final an lut tawh bawk. English football club chanchina ngaihnawm leh ropui ber ziak turin vanneihnain Liverpool lam a ṭang zel e.

Mahse, City champion leh champion loh hi an kuta la innghat a ni a, match tawp berah Aston Villa an hneh chuan, Reds hian an hmabak match hnihah pawh hnehna chang se City tho champion tur an ni.

City boss Pep Guardiola chuan, "A tawp thleng kan beih a ngai dawn. Kan vanneihna erawh kan khelmualah kan inlan dawn a, engkim kan kutah a la awm - midang kan ngaihtuah dawn lo. Kan match khelh tura chak kan tum dawn a, Etihad Stadium khatin fan-ten min thlawp ang tih ka ring," a ti - khat zo tak ang maw?

Sawp rawh u...
West Ham nen an inhnehtawk zawhah Pep hi Liverpool nena inkhel tur Southampton hnena a thuchah duh zawh a ni a, Spanish manager chuan, "Liverpool hi 4-0 in lo hneh rawh se," a ti!

St Mary's Stadium-a inkhel tur an nih avangin Southampton tan Liverpool chelh theih beiseina a awm a, mahse, Pep-a beisei ang result thleng tur erawh chuan thil mak a thlen a ngai ang.

Liverpool hian tun season-a inelna an hmachhawn zawng zawngah match an khel kim vek dawn a, team dang zawng aiin an chau fal - FA Cup final-ah Mohamed Salah, Virgil van Dijk leh Andy Robertson chu hliam vangin lakchhuah an ngai bawk.

Salah leh VVD hi zaninah an inlan theih a la rinawm chiah lo a, chutihrual chuan Robertson dinhmun erawh a ngaihtuahawm lo - an player ṭha pahnih tel loa khel tur Liverpool hneh hi Saints tan thil theih loh tawp a ni lo a, City fan-ten thinlung leh tihtak zetin an lo ṭan bawk ang!

Hmangaih Gerrard
English media leh fans tam takin titi tui berah Steven Gerrard an nei leh der tawh - a awm lo hran lo. Player a nih laiin Premier League-ah Reds champion pui thei lo mah se coach a nih hnuah champion tir theih dan a nei - team dang coach ni chung ngatin.

Liverpool hi an hmabak match hnihah chak ta se, Gerrard-a'n Villa hmanga City a lo chelh chuan Reds an champion ang - Liverpool khawpui lawmna san turzia hi thua sawifiah chi pawh a ni lo!

Gerrard hian a club hmangaih em em hi Premier League champion ni turin a duhsak ang tih chu thil chiangsa a ni a, Etihad Stadium-ah thawnthu ngaihnawm ziak turin a inpuahchah ṭan der tawh ang.

Mahse, Klopp chuan, "City hian a zawna point an hloh ka ring lo. Mahse, nakin inkhel turin zanina kan match a tibuai lo ang," a ti a, a naute pressure neih tur a chhem kiang.