Mark Noble a chawl dawn ta

West Ham legend Mark Noble chuan Hammers khelmuala a match hnuhnung ber a khel a, kum 35 mi midfielder hian season tharah chuan inkhelh a chawlhsan tawh dawn.

Arsenal academy-a bul ṭantu, West Ham chherchhuah ni ta Noble hian August 2004 khan kum 17 mi lek niin Hammers tana a match hmasa ber a khel a, a hawikir tawh lo.

London club-in inzir nan Hull City leh Ipswich Town-ah loan-in an khelhtir tih loh chu club dang tan a khel lo a, a hun ṭha zawng zawng chu Hammers-ah a vui liam.

English midfielder hian Hammers tan inelna hrang hrangah match 549 a khel a, goal 62 khungsakin assist vawi 61 a nei a, West Ham fan-ten an theihnghilh tawh lo ang.

Noble chuan, "Kei leh ka chhungte tan chuan ni lunglenthlak tak a ni - chhungte ka ngah em em a, ka chhungte ka tih hian mipui 60,000 ka sawi a ni. Kum 18 chhung khan in hlimna ka thlen ve ngeiin ka ring a ni," a ti a, mittui nen West Ham fan-te a thlah.

Hammers hian league match khat khelh tur la nei mah se khualmualah a ni tawh dawn a, May 22 zanah Brighton & Hove Albion an lenchilh dawn.

Match khat khelh tur la nei chungin season tharah Europa Conference League tal an khel dawn tih a chiang tawh bawk a, an club chanchina European football a zawna an khelhna hmasa ber tur a ni.