Djokovic-a'n nomawi a chawi leh ta

Novak Djokovic chuan kumina a vawi khat nan nomawi a chawi ve leh ta. Pathianni zana khelh zawh tak Italian Open final-ah Djokovic hian Stefanos Tsitsipas chu 6-0, 7-6 (7-5) in a hneh.

Kum 34 mi Novak hian set khatna la turin harsatna a nei lo, game hloh miah loin a la. Set hnihnaah erawh 4-1 in a hniam fal hman, tie break a khelh pui hnuah harsa takin set hnuhnung zawk pawh a la leh ta tho.

May 26 aṭangin French Open khelh a ni dawn a, clay court tournament-a champion hlim Djokovic hi Paris khawpuiah pawh champion tura rinkai a ni dawn, a vawi 21 nan Grand Slam champion nih a tum ang.

World number 1 Djokovic chuan, "Roland Garros inbuatsaih nan hetiang baka ṭha hi a awm thei tawh chuang lo. Tunah chuan inrintawkna sang tak bakah phurna nasa tak nen Paris khawpui ka pan thei dawn," tiin a sawi.

Hripui leng laka invenna a lak duh loh avangin Djokovic hian season tir lamah buaina a tawk. Australian Open khel tura Melbourne a thlen hnuah thawn haw leh a ni a, Masters tournament khel turin US a pan thei lo bawk.

Monte Carlo leh Madrid Open erawh a khel thei, a hlawhtling nghal mai lo. Tun season atan pangngai taka tournament a khelh theih pathumna Italian Open-ah erawh a vawi ruk nan a champion thung.

Grand Slam vawi 20 champion tawh Djokovic chuan, "Kum tir lamah harsatna hrang hrang ka tawk, tun hnaiah erawh chanchin lawmawm lam ka dawng chho ve leh ta. A bul ṭan fuh lo mah ila ka inkhelh theih chinah theihtawp ka chhuah dawn," a ti.

French Open khelh hun a hnai a, champion hnem ber Rafael Nadal chu ke hliam vangin 100%-in a dam hman lo mai thei. Champion lai Novak tan Spanish player tho Carlos Alcaraz chu a elpui hautak ber tura ngaih a ni ang.

Alcaraz hi kum 19 chauh ni mah se world number 6 a ni thei tawh a, tun hnai khan Madrid leh Barcelona Open-ah a champion. Clay court hi a inkhelh thiamna a nih avangin Paris-ah pawh mipui mit fukna a ni dawn.