Thomas Cup champion India

Ram leh ram mipa badminton team hmanga inelna Thomas Cup khelh zawh takah India tlangval te an champion. India hian champion lai leh record nei ṭha ber ni bawk Indonesia chu 3-0 in a hneh a, a vawi khat nan nomawi an chawi.

Pathianni zan final inkhelah India an che fuh hle. Satwiksairaj Rankireddy leh Chirag Shetty te ṭangdun chuan match point vawi li an inchhanhim hnuah Mohammad Ahsan leh Kevin Sanjaya Sukamuljo te 18-21, 23-21, 21-19 in an hneh.

Anni pahnih an chak hma hian, singles match hmasa berah world championship bronze medallist Lakshya Sen chuan Anthony Sinisuka Ginting 8-21, 21-17, 21-16 in a lo hneh tawh bawk.

Match pathmunaah India dinhmun a ṭha tawh a, mahse hmabak a la hautak hle. Inkhel pawimawhah Kidambi Srikanth a rawn ding chhuak, world number 1 hlui hian Jonatan Christie 21-15, 23-21 a hnehin India a champion pui.

India hi group C-ah Chinese Taipei, Germany leh Canada te nen an awm khawm. Pahnihna ni chungin knockout round an lut, quarterfinal-ah Malaysia (3-2) hnehin, semifinal-ah Denmark chu 3-2 bawkin an lo hneh tawh bawk.

Srikanth chuan, "Mimal inelna leh team inelna chu a danglam. Ram tana feh chhuah chu a boruak a danglam leh hlak bawk. Hlawhtlinna hrang hrang ka lo chang ve tawh, India tana Thomas Cup chawi hi ka hlawhtlin tawhnaah chuan ka dahsan berte zinga mi a ni," a ti.

India chief coach Pullela Gopichand chuan, "Indian Sports tan chu mellung pawimawh bik a ni. Player zawng zawng an khel ṭha vek, singles chauh ni loin doubles huanga hlawhtlinna kan chang chho thei ta hian min ti lawm zual," a ti.

Hmeichhe inelna lam Uber Cup-ah pawh India an inlan, group D-ah pahnihna niin knockout round an lut. Mahse, quarterfinal-ah India hian Thailand chu 3-0 in an ngam lo.

Champion tawhte:
Indonesia (14 titles): (1958, 1961, 1964, 1970, 1973, 1976, 1979, 1984, 1994, 1996, 1998, 2000, 2002, 2020).
Chine (10 titles): (1982, 1986, 1988, 1990, 2004, 2006, 2008, 2010, 2012, 2018).
Malaysia (5 titles): (1949, 1952, 1955, 1967, 1992)
Denmark (1 title): (2016)
Japan (1 title): (2014)
India (1 title): (2022)