NT-a'n WBC Asia title a fight dawn

Mizo boxer lar NT Lalbiakkima chuan WBC Asia light-flyweight title fight a hmachhawn dawn a, June 18 khian Indonesian boxer lar Jayson Paden Vayson nen an inhnek dawn - fight a hmuhnawm loh ring suh.

Vanglainiin WBC lehkha a hmuh aṭanga a lan danin, NT-a te fight hi Dubai khawpuiah neih tur a ni. Siaha boxer bakah hian Laldingliana chu Dubai-ah hian a inlan ve dawn bawk a, ani hian Kazakhstan boxer Alimzhan Tursunov a hmachhawn dawn bawk.

NT-a hmachhawn tur Jayson Vayson hi professional boxing-ah a mikhual lo - vawi 10 fight hmachhawn tawhin vawi kua hnehna a chang a, vawi khat hi 'no contest' ah puansak a ni.

Kum 24 mi Vayson hian vawi kua hnehna a chanah vawi nga chu a khingpui a knockout a, 'no contest' a an puansak inhnekah hian WBC international light-flyweight title fight a hmachhawn.

Vaysin hian champion lai, amah ang thoa Indonesian mi Tibo Monabesa a hmachhawn a, fans tam takin chak zawkah an ngai. Mahse, judge lamin rin loh takin Monabesa hi chakah an puang.

Jakarta khawpuia fight result hian Indonesian media titi a luah a, WBC pawhin fight hi ennawnin, judge-ten chak zawka Monabesa an puanna chu felhlel a awmah ngaiin, 'no contest' ah an puan phah a ni.

NT-a chuan, "Jayson hi WBC international title lo fight tawh a ni a, ka tan a awlsam dawn lo tih ka hria. Mahse, hetiang taka fighter ṭha hmachhawn hi a phurawm a, ka tan fiahna ṭha tak a ni ngei dawn e," tiin Vanglaini a hrilh.

Zo Keite chuan sawi zawmin, "Inbuatsaihna ṭha takin ka nei ang a, ka hneh em em ang," a ti a, a inringtawk - NT-a hi Indian professional boxer hmasa ber Dharmendra Singh Yadav chuan Dubai inhnek turah hian a ṭawiawm dawn.

Dharmendra hi Indian boxer zinga international medal hlawh chhuak hmasa ber, Mizo legend Zoramthanga'n Boxing World Cup-a bronze medal a hlawhchhuah theihna tura a hneh kha a ni a, NT-a nen hian India team-ah an lo inhrawn tawh ṭhin.

Indian boxing team doctor, Dr. Karan chuan NT-a hi title fight hmachhawn tura a inbuatsaihna kawngah a pui dawn bawk - ani pawh hi NT-a nena lo thawk dun tawh ṭhin tho a ni.