Arsenal chungah Spurs

17th May, 2022

Pathianni zan khan Tottenham Hotspur chuan Harry Kane-a penalty hmangin Burnley 1-0 in an hneh hram a, Premier League-ah palinaah awmin Champions League khel thei chinah awm. Nizan khan Arsenal-in Newcastle United an tlawh a, Gunners hian hnehna an chang a nih chuan palinaah an awm leh thung ang.

Antonio Conte hote hian Clarets an hmachhawn hma hian an elpui Arsenal 3-0 in an sawp a, Burnley an hmachhawnna hmun hi an mual bawk ni mah se Gunners laka an khelh ṭhat angin an khel ṭha nawn tawh lo. Chutihrualin an mamawh ber point thum erawh an hlawh chhuak tho.

Spurs hian inkhel thunun mah se chak turin VAR puihna an mamawh a, Davinson Sanchez-a ball tih per chuan Clarets player Ashley Barnes kut a tai fuh. Thil thlen hnuah hian Kane pawhin chance a nei a, chumi hnuah thil thlen dan hi en let niin referee Kevin Friend-a'n mual sira 'monitor' a en let hnuah penalty a pe.

Penalty hmuh danin sawisel kai mah se Kane-a penalty erawh a ṭha thlawt a, keeper Nick Pope tan dan rual a ni lo. First half injury time-ah Spurs-in goal hmahruai an khung a, second half-ah goal a luh belh tawh lo.

Spurs boss Antonio Conte chuan, "Point thum kan hmu a, Champions League khelh kan duh a nih chuan a pawimawh takzet. Chutihrualin kan kutah a innghat lo a, kan tih theih chu point thum hmuh zel a, Arsenal pressure pek a ni," tiin a sawi a, Arsenal leh Newcastle inkhel a en ngei tur thu a sawi bawk.

Premier League aṭangin Manchester City leh Liverpool te Champions League khel turin an tling tawh. Pathumna Chelsea-in Leicester City leh Watford an la hmachhawn dawn a, point hnih chiah hmuh a ngaih tawh avangin an himah a ngaih theih tawh.

Hmunruak pakhat hi North London club pahnih Arsenal leh Tottenham ten an la inchuh mek. Spurs hian match khat chiah khelh tur an nei tawh a, Premier League tawp niah table mawngphaha awm Norwich City an lenchilh dawn avangin point thum chu a hminah a ngaih theih.

Chutihrualin Conte sawi angin Spurs hi Arsenal kutah an innghat a, Gunners hian Newcastle bakah Everton an la mikhual dawn. Mikael Arteta te hian nikum khan Magpies hi an hneh tawh a, amaherawhchu season tawpa an hmachhawn tur Toffees hi an mualah an hneh lo - thil chiang a la awm lo!