Premier League aṭangin tu ber nge tla dawn? Everton, Leeds United & Burnley

Premier League relegation battle a nung chho hle. Frank Lampard-a kaihhruai Everton-in kawng dik an zawh hnuah Brentford an inlehthaltir a, an la him lo. Leeds United-in injury time-a Pascal Struijk goal hmangin Brighton & Hove Albion lakah point khat hlu tak an hlawh chhuak a, an dinhmun a ṭha hret. Burnley-in Spurs an hneh lo, tla thei dinhmunah an ding.

Pathianni zan Premier League inkhel kha relegation battle ngaihven tan chuan inkhelh hmuhnawm bik a ni a, tlai thei dinhmuna ding club pathum an inlan vek. Leeds-in match khat chauh khelh tur an nei tawh a, Toffees leh Clarets ten match hnih khelh tur an la nei - tling thei leh tla thei vek an la ni.

Him, him leh lo
Goodison Park-ah Everton-in Brentford an mikhual a, Toffees hian point thum hmu se him thei tur an ni. Lampard-a nauten bul an ṭan ṭha a, minute 10-na lekah Richarlison-a ball pet chu Dominic Calvert-Lewin-a'n khawih fuh lehin goal kilah tak a lut.

Everton an phur a, an goal bawh pawh a na. Richarlison-a'n Kristoffer Ajer lakah penalty a beisei a, mahse referee-in a en liam avangin Bees-in an vaw let a, rawlthar defender Jarrad Branthwaite-a'n mikhual team forward Ivan Toney a ti tlu. Penalty beisei Everton defender Branthwaite hnawhchhuah a ni ta zawk.

Minute 37-naah Bees winger Yoane Wissa cross chuan Everton defender Seamus Coleman perin goal-ah a lut. Lampard-a nauten player 10-in an khel a, chutichung chuan first half hun pek belhah Richarlison-a'n a penalty hmuh chu goal-ah a chantir.

Halftime-ah Everton-in 2-1 in hma an hruai a, chak se him thei an ni. Mahse second half-ah mangchhia a thleng. Bees tan Yoane Wissa leh Rico Henry ten an khung belh a, 2-1 in hma an hruai ta zawk. Everton harsatna belhchhah turin substitute Salomon Rondon chu minute 88-naah Henry a tlawh avagnin a phu angin hnawhchhuah a ni.

Everton-in hun ṭha an bawhpelh a, Lampard erawhin a nauten Bees lakah theihtawp an chhuah thu a sawi. Toffees hian Crystal Palace leh Arsenal an la hmachhawn dawn a, Premier League-a inhamtang turin point thum hmuh a la ngai. Lampard leh a hote hi an dinhmun a ṭha lo a, chutihrualin tla thei pathum zingah an dinhmun an ṭha ber thung.

Goal hlu bik
Leeds United-in Elland Road-ah Manchester United sawptu Brighton & Hove Albion an mikhual a, point khat hlu tak an hlawh chhuak. Seagulls-in Danny Welbeck hmangin minute 21-naah goal an khung hmasa a, Leeds player leh supporter-te an beidawn phah lo.

Mateusz Klich leh Raphinha te Brighton tlarhnung an tibuai a, mipui thawm a ṭha hle. Injury time-ah Leeds-in an huaisen rah an seng a, Joe Gelhardt cross chu goal ban bula awm Pascal Struijk-a'n a tauh goal. Leeds-in point khat hlu bik an hlawh chhuak a, Struijk-a goal hmangin hmun himah an awm rih a, Premier League an khelh zui theih phah bawk.

Leeds manager Jesse Marsch chuan, "Point khat pressure ṭhenkhat a la kiang a, tuna kan inbeihna hi chu khelmual chauh ni tawh loin rilru inbeihna pawh a tel. Engmah hi a awlsam lo a, theihtawp kan chhuah zel dawn. Match tawp berah pawh kan theihna zawng zawng kan chhuah ang," tiin a sawi.

Premier League tawp niah Leeds United-in Brentford an hmachhawn dawn a, Bees hi Everton hnehtu an ni tih hriat a ṭha. Chutihrualin Marsch leh a hote hi club dang result-ah an innghat a, match khat chauh khelh tur an neih laiin Toffees leh Clarets ten match hnih khelh tur an la nei thung.

Penalty mawlh kha
Tottenham leh Burnley dang-lamna chu penalty a ni a, referee thutlukna vangin Clarets hi tla thei dinhmunah an ding mek. Burnley caretaker Michael Jackson chuan, "Penalty an pekna kha ka ennawn leh hnu pawhin penatly-ah ka ngai lo. Thutlukna vangin ka thinur a, chutihrualin ka naute khelh danah erawh ka lawm. Chak duhna thinlung ka hmu a, team anga theihtawp chhuah ka hmu," tiin a sawi.

Burnley hian Aston Villa leh Newcastle United an la hmachhawn dawn a, Leeds United aia an goal difference a ṭhat avangin him turin point khat a tawk thei. Chutihrualin Leeds hian point thum an hmuh belh a nih erawh chuan Clarets tan him turin point li tal a ngai - a awlsam dawn lo.