Champion lai Bucks hnehtu Boston Celtics

NBA playoff chin hi chu a boruak a danglam ṭhin. NBA champion lai Milwaukee Bucks chu Boston Celtics hneh loin Eastern Conference semifinal-ah an zinkawng a tawp; Celtics hian 109-81 a hnehna changin best of seven series chu 4-3 in an la.

Eastern Conference Finals-ah Celtics hian Miami Heat an tum dawn. Heat hian Philadelphia 76ers an lo hneh ve tawh bawk. May 18, Nilaini hian game 1 an khel ṭan ang, match hmasa pahnih hi Miami mualah an khel dawn a ni.

Nimin zing khan Western Conference lamah semifinal game 7 khelh a ni bawk. Regular season laia kal filawr tak Phoenix Suns chu Dallas Mavericks lakah 123-90 in an chak lo a, series-ah 4-3 in Suns hi an tla. Mavericks leh Golden State Warriors ten conference champion an zawng dawn.

Celtics an chungnung
Regular season an khelh dan thlir chuan Milwaukee Bucks leh Boston Celtics te an inkhel tawk viau hi a mak hran lo, pahnihna leh pathumna ni chunga playoff khel an ni, game 7 thlengin a hmuhnawm.

NBA Most Valuable Player vawi hnih ni tawh Giannis Antetokounmpo-a'n bul a ṭan fuh a, a team Bucks hi quarter hmasa berah 26-20 in hma a hruaipui, mahse a hnu lam erawh Celtics lam chan vek tia sawi theih a ni thung.

Grant Williams (27 points) leh Jayson Tatum (23) ten team an chakpui a, 2008 hnua a vawi khat nan NBA champion nih leh an beisei mek. Los Angeles Lakers nena NBA champion hnem ber (17 titles) an inṭawm chu kuminah kal fal an tum dawn.

Mangṭha Suns
Phoenix Suns hi rinkai zawk an ni, game hmasa pahnihah pawh an chak. Mahse, a rei tual tual a, a tawpah chuan a chesual zawkah an ṭang. Dallas Mavericks tan Luka Doncic a inlar, point 35 a neih bakah rebound vawi 10 a la.

Bench aṭanga lut Spencer Dinwiddie-a'n point 30 a nei bawk a, point 24 neitu Jalen Brunson a khelh ṭhat bawk avangin an chungnung. Quarter hmasa pathumah a sang zawk an ni vek a, a tawp berah hniam deuh mah se an dinhmun a nghing phak tawh lo.

Slovenian tlangval Doncic chuan, "Player zawng zawng khan kan theihna sang ber kan hlan vek. Mimal ai chuan team thawhhona ṭha hi a pawimawh tih a takin kan hmu leh ta," tiin a ṭhiante a chhuan thu a sawi.

Western Conference
Semifinals
Game 1: Phoenix Suns 121 - 114 Dallas Mavericks
Game 2: Phoenix Suns 129 - 109 Dallas Mavericks
Game 3: Dallas Mavericks 103 - 94 Phoenix Suns
Game 4: Dallas Mavericks 111 - 101 Phoenix Suns
Game 5: Phoenix Suns 110 - 80 Dallas Mavericks
Game 6: Dallas Mavericks 113 - 83 Phoenix Suns
Game 7: Phoenix Suns 90 - 123 Dallas Mavericks
(Mavericks hian 4-3 in series an la)

Finals
May 19, Ningani
Game 1: Golden State Warriors 08:30 AM Dallas Mavericks
May 21, Inrinni
Game 2: Golden State Warriors 08:30 AM Dallas Mavericks

Eastern Conference
Semifinals
Game 1: Milwaukee Bucks 101 - 89 Boston Celtics
Game 2: Boston Celtics 109 - 86 Milwaukee Bucks
Game 3: Milwaukee Bucks 103 - 101 Boston Celtics
Game 4: Milwaukee Bucks 108 - 116 Boston Celtics
Game 5: Boston Celtics 107 - 110 Milwaukee Bucks
Game 6: Milwaukee Bucks 95 - 108 Boston Celtics
Game 7: Boston Celtics 109 - 81 Milwaukee Bucks
(Centics hian 4-3 in series an la)

Finals
May 18, Nilaini
Game 1: Miami Heat 06:00 AM Boston Celtics
May 20, Zirtawpni
Game 2: Miami Heat 06:00 AM Boston Celtics