IPL pakhatna Gujarat Titans

Gujarat Titans chuan Pathianni zan khan Chennai Super Kings chu wicket sarihin an hneh a, Indian Premier League an khelh hmasak berah pakhatna dinhmun an hauh. Titans hian league round bika pakhatna an nih avangin qualifier 1 an khel dawn.

Wankhede Stadium-ah ṭhumvawra vannei CSK-in bat hmasak an thlang. Chennai tan Ruturaj Gaikwad (53), Narayan Jagadeesan (39*) leh Moeen Ali (21) te an che ṭha a, 133/5 runs an siam.

Gujarat tan opener Wriddhiman Saha a khel ṭha a, thi loin 65 runs a siam avangin chak turin harsatna lian tham an tawk lo. Over 19.1-ah wicket thum chauh hlohin 137 runs an siam a, hnehna an chang.

IPL-ah hian a sang paliin playoff an khel dawn. Pakhatna leh pahnihna awm phak hi a pawimawh hle. A sang pahnih hian qualifier 1 an khel a, a chak zawkin final lutin a chak lo zawkin eliminator-a (pathumna vs palina) chak zawk nen final lut tur an zawng leh ang.

Zanin dar 7:30 hian Mumbai Indians leh Sunrisers Hyderabad te an inkhel dawn a, Hyderabad tan playoff khel turin chak ngei a ṭul dawn a ni.