Curacao-ah Ten Hag zin ve dawn lo

Dutch champion Ajax chu season chawlh hman hmain friendly match khel turin Curacao-ah an zin dawn a, national team nen friendly match an khel dawn. Manager Erik ten Hag erawh season thara a enkawl tur Manchester United tana insawrbing a duh avangin a zin ve dawn lo.

Ajax hian Pathianni khan league match hnuhnung berah Vitesse an hmachhawn a, 2-2 in an inhnehtawk. Dutch club hian match hnuhnung ber khelh hma hian champion nomawi an chawi tawh.

Kum 52 mi Ten Hag chuan, "Hnathawh tur ṭhahnem tak a awm. Club thar enkawl dawn hi chuan hna hi a tam ṭhin hrim hrim. Coaching staff bakah squad kan siksawi a ṭul a, hna kan ṭan nghal ang," tiin a sawi a, Dutch manager hian nimin aṭangin hna hi a thawk ṭan dawn.

Chutihrualin official-a Ten Hag-a'n Man United a enkawl hun chu season tawp hun a ni a, amaherawhchu a rang lama hnathawh ṭan a duh. Man United hian tunkar tawp hian Premier League match hnuhnung berah Ralf Rangnick-a hoin Crystal Palace an la hmachhawn dawn a ni.