Dan theih loh Iga Swiatek

Hmeichhe tennis world number 1 Iga Swiatek hi dan theih lohin a kal tluang mek. Polish nula hian Ons Jabeur chu 6-2, 6-2 a hnehin Italian Open nomawi a chawi a, tun hnaiah a zawnin match 28 a chak ta.

Kum 20 mi Swiatek hi a khel ṭha tluang hle, tournament a khelh hnuhnung pangaah a champion vek. Nikum pawh khan Rome khawpuiah hian hlawhtlinna a lo chang tawh, nomawi humhim turin harsatna a tawk lo.

Swiatek chuan, "Engthawl takin ka nomawi hi ka lawm dawn, taksa tih hahdam ka mamawh. French Open khelh hunah kan inhmu leh dawn nia," a ti. Kar leh tawp lama khelh tur French Open-ah pawh champion tura rinkai a ni ang.

Chak lo Jabeur pawh hian season duhawm a hmang ve tho. Tun thlatir khan Madrid Open nomawi a chawi a, African player zingah WTA 1000 title la thei hmasa ber a ni a, match 11 a chak zawn chu Swiatek lakah a tawp ta rih.