Barcelona an chelh

Pathianni zan La Liga inkhelah Getafe-in Barcelona an chelh a, goal awm loin an inhnehtawk. Xavi hote hi chak zo lo mah se match 37 aṭangin point 73 an hmu a, pathumna Atletico Madrid-in an lehpelh theih tawh loh avangin pahnihnaah an awm ang.

Coliseum Alfonso Pérez-a inkhelah chance a awm meuh lo a, Barca-in Manchester City winger hlui Ferran Torres hmangin goal zawnah vawi khat chiah an pet. Catalan club hi pahnihna an nih avangin season tharah Super Cup an khel ang.

Spanish Super Cup-ah hian La Liga champion Real Madrid, pahnihna Barcelona bakah Copa del Rey champion Real Betis leh pahnihna Valencia te an inel dawn a ni.

Inkhel dangah Atletico Madrid leh Sevilla te 1-1 in an inhnehtawk. Atletico manager Diego Simeone chuan, "Han sawi belh tur a awm lo. Atletico Madrid-ah ka hna ka chhunzawm dawn a, hlauhthawn tur a awm lo," tiin Madrid club chhuahsan a tum loh thu a sawi.