Inter leh Milan an inum zel ; A tawp niah an chingfel dawn

Serie A champion tur a la chiang thei lo a, tun season match hnuhnung ber an khelh hunah a chiang dawn chauh. Hmahruaitu AC Milan chu champion lai Inter Milan-in an la um zel, an inkarah point hnih a awm.

Milan hian Pathianni zan khan San Siro-ah Atalanta 2-0 in an hneh a, point ngain an sang fal. A hnuah Inter an inlan ve thung, chak lo ni se chuan Milan an champion ang, mahse Inter hian Cagliari 3-1 in an hneh ve bawk.

Milan an tlo
Stefano Pioli-a'n inkhelh hmain an match chauh an ngaihtuah tur thu a sawi lawk, a naute a fuih ṭha tih a lang bawk. Fans lam thawm ṭha viau karah player an talbuai lo, chawlhlawk hma erawh chuan goal an khung thei lo.

Second half tir lamah Rafael Leao chuan a tharum leh tlan chakna hmangin remchang a insiam, keeper kapkarah chhuih lutin a team hma a hruaipui. Theo Hernandez-a'n anmahni lam aṭanga lehlam box bul thleng ball a tlanpui hnuah goal ropui a khung bawk.

Milan hian an match hnuhnung berah Sassuolo an hmachhawn dawn, champion tur chuan point khat hmuh belh a tawk ang. Pioli naute hi January aṭang khan league bikah tlawm an la nei lo, league match 15 chhung tlawm loin an kaltluang ta.

Pioli chuan, "Kan boruak tawn hi a nuam, tun season atan kan khelmuala kan match hnuhnung ber a ni, season tir aṭanga min thlawptu fans hnathawh a ropui ka ti hle. Anni vanga beiseina nung nei thei chauh kan ni.

"Khelmual kan chhuahsan a, bus kan chuang tur kha fans 10,000 chuangin min lo la nghak, tun kar tawpa fans boruak ang hi match hnuhnung ber khelh hunah pawh neih leh ka duh," tiin a sawi.

Inter beiseina
Serie A-ah chuan point dawtah head-to-head en tur a ni. Tehna pahnihah Inter hian Milan an phak lo, mahse an beidawng duh bik chuang lo. An tih theih chu match hnuhnung ber thlenga hnehna chan a ni a, chumi tur chuan an bei chhunzawm ang.

Milan an chak tih hre sa chungin Inter an inlan, chak lo se chuan nomawi an hloh fel ang. Amaherawhchu, Lautaro Martinez-a goal hnih bakah Matteo Darmian-a goal hmangin Cagliari 3-1 in an luhchhuah a, beiseina chhete an neih chu an vawng nung.

Goal hnih khungtu Martinez chuan, "Cagliari lamin goal an rawn neih khan rilru chu a hlauthawng hman. Mahse hnehna chan duh tlat kan ni a, kan duh leh beisei ang ngeiin a tawpah chuan thil a thleng, tunah chuan match hnuhnung bera chak kan tum leh ang," a ti.

Inter hian match hnuhnung berah Sampdoria an tum dawn, an khingpui tur hi table mawng lama awm ni mah se a him zinga mi an ni a, an inkhelhna tur hi San Siro a nih bawk avangin chak zawk tura ngaih an ni ang.