Liverpool tan nomawi nghah rih a ngai
Premier League champion tur Liverpool-in league khelh chhunzawm leh a nih hnua an match hmasa berah Everton an draw thei hram a, champion tur chuan an nghah hret a la ngai dawn.
Merseyside derby boruak 'hot' tak ni ṭhinah fans an awm lo a, beisei angin inkhel boruak a nung thei lo - team pahnihin goal an khung lo ve ve a, 0-0 in inkhel a tawp.
Liverpool hian hnehna chang se chuan Nilaini zana Crystal Palace an mikhual hunah an chak chuan champion thei tawh tur an ni. Mahse, point khat chiah an hlawhchhuah avangin Palace laka champion tur chuan Burnley puihna an mamawh.
Burnley hian nizan khan Manchester City an lenchilh a, City hi an chak zo lo a nih chuan Palace an mikhual hunah Liverpool an chak chuan an champion ang - he thuziak i chhiar meuh chuan result i hre tawh ang.
Alisson fakna
Liverpool boss Jurgen Klopp chuan inkhelh zawhah, "Alisson kan nei thei hi kan vanneihna kan hriatthiam a ṭul a ni. A khel ṭha takzet - minute 90 chhung hna a nei mang lo a, mahse hlauhawm a lo thlenin a ding chhuak vat zel.
"A chet dan kha world class goalkeeper chet dan dik tak a ni," tiin a keeper a fak - Klopp-a ṭawngkam hian thui takin inkhel boruak a hril a, Goodison Park-ah Everton-in chak turin hun an nei ṭha zawk, ti pawhin a sawi theih.
Brazilian keeper ṭha mi hian Everton forward ṭhangduang Dominic Calvert-Lewin-a hunṭha neih chu ṭha zetin a lo dansak a, a hnampui Richarlison-a hming chherna tur a dansak bawk.
Everton keeper Jordan Pickford pawhin hna a nei ve tho a, Alisson ang thoin hna thawh tur erawh a tam bik lo - Fabinho freekick pet a dan erawh goalkeeper ṭha danglamna pholangtu a ni.
Ṭha tawk lo Reds
Merseyside derby-a Liverpool khelh dan khaikhawmna ṭha ber chu, "An khel ṭha tawk lo," tih hi a ni a, Reds hi Covid-19 vanga chawlh a nih hmaa Liverpool team kha an ni ta lo em ni chu aw, tih mai tur an ni.
Ni 106 zet inkhel lo tawh Liverpool hi dem theih erawh an ni lo a, Klopp chuan squad a siksawi nasa hle bawk. Tlarhmaa an thiampuipa Mohamed Salah chu bench-ah a ṭhu tluan a, hliam vangin Andy Robertson a inlan thei lo bawk.
Liverpool player zingah Naby Keita chu player langsar a ni a, mahse Klopp chuan a midfielder hi la chhuakin Georginio Wijnaldum chu goal nawr turin a luhtir.
James Milner leh Joel Matip chu hliam vangin lakchhuah an ngai a, Klopp tan mangan viauna tur erawh niin a lang lo - Premier League champion turin point nga bak an mamawh tawh lo a, inelna dang ngaihtuah tur an nei tawh lo bawk.
Ancelotti hnuaia Everton
Carlo Ancelotti awm hnua Everton danglamna a lang chhuak leh ta a, December-a 5-2 ngawta Liverpool-in an nghaisak hnu team nen kha chuan an inthlau hle.
Captain Seamus Coleman a khel ṭha tluan chhuak zak a, Liverpool an chelh theih nana player ṭangkai a ni. Kum 23 mi defender ṭhangduang Mason Holgate fak tel loh a harsa a, khelmuala a che leh au vel chuan hruaitu ṭha a nih telzia a pholang chiang hle. Tlarhmaa Calvert-Lewin leh Richarlison inkawp an hmuhnawm a, player pahnih hi an khelh ṭhat ni chuan Premier League-a eng tlarhnung pawh ṭhiat turin an ṭha tawk.
Ancelotti hian season zawh hunah a duh ang tak player lalut turin sum a neih ngei a rinawm a, a player neih sa nena enin Premier League 'Big Six' tia kan sawi ṭhin club huangah 'Big Seven' tia rin luh an ngai a nih pawhin a mak lo ang.
Everton kha team ṭha tak an ni a, tlan tam kan ngaih phah hle. Mahse, kan tha a thoin kan inpeih hle niin ka hmu. Ni thum dang inbuatsaihna hun kan nei a, an match hmasaa khel ṭha tak Crystal Palace hmachhawn turin kan inpeih a ngai a ni.
- Jurgen Klopp,
Liverpool manager
A nihna dik tak sawi ila, chak thei dinhmunah kan ding a ni. Mahse, game hautak a ni a, a harsa takzet, Kan khel ṭha a, kan rilru kan pe a, kan theihna zawng zawng kan hlan a ni. Goal khung theihna hun pawh kan nei hial a nih kha. Liverpool an khel ṭha a, an tlarhnung an veng hneh hle.
- Carlo Ancelotti,
Everton manager
Inkhel Chhehvel
• Goodison Park-a Premier League Merseyside derby match hnuhnung pariatah match sarih chu chak zawk awm loin an ṭin.
• Liverpool hian Everton an hmachhawn hnuhnung 22-ah tlawm an nei ta lo a, October 2010-a 2-0 a an tlawm hnu khan Everton lakah an tlawm ta miah lo.
• Everton hi Premier League club zingah inelna hrang hranga mahni muala kum 2020-a la tlawm miah lo awmchhun an ni - vawi nga inkhelhah vawi hnih an chak a, vawi thum an draw.
• Liverpool hi Premier League-a an match hnuhnung pathumah vawi hnih chu an chak zo lo ta a, hemi hma hian an match hnuhnung 38-ah vawi hnih chiah chak zawh loh an nei.
• Liverpool manager Jurgen Klopp hian Everton hi inelna hrang hrangah vawi 11 hmachhawn tawhin a la tlawm miah lo a, vawi sarih hnehin vawi li a draw - hei aia record ṭhat zawkna club a nei lo.
• Everton starting XI kum upat zawng chawhrual chu kum 24 leh ni 356 a ni a, February 1986 (kum 24 leh ni 50) hnua Liverpool laka starting XI kum chawhrual an naupan ber ṭum a ni.
• James Milner-a'n a vawi 535-nan Premier League match a khel a, Premier League-a inlan tam lamah pangana niin Gary Speed a nihrual.