Hnehna nen Inter Milan an lo kir

Inter Milan chuan Sampdoria 2-1 a hnehin Serie A nomawi an beiseina an chhi nung zel a, inkhel dangah Atalanta pawhin Sassuolo lakah 4-1 a hnehna changin palina dinhmun an sawhnghet bawk.

Zanin hian pahnihna Lazio an inlan dawn a, champion beisei lai hi Hellas Verona mualah an lenglut ang. Nizan khan a zawna vawi riat champion tawh Juventus an inlan a, result kan hre hman lo.

Lazio hi season hmang ṭha leh kaltluang tak an ni a, team ṭha Juve elphak ber pawh an ni. Amaherawhchu season tir lam khan an mikhual Verona hi goal awm loin an inhnehtawk pui; European football khelh beisei lai an la nih avangin a awlsam dawn lo tih a chiang .

Coronavirus vanga hun rei tak an chawlh hnuah Italian football a lo kir leh. San Siro bikah ni 115 hnuah Inter Milan an inlan leh a, inkhel chawhma lam an thunun viau - striker Romelu Lukaku leh Lautaro Martinez te goal hmangin hma an hruai.

Lukaku-a'n goal khung turin minute 10 bak a mamawh lo. Belgium international hian yard 10-a hla aṭangin goal hmahruai a khung a, tun season kal laia a league goal 18-na hi ṭhingṭhi chungin a lawm.

Nuamsa takin Inter an chak dawn niin a lang hman. Mahse second half tir lamah mikhual tan Morten Thorsby chuan si phurh a sut ṭhen a, hun tawp thlengin goal dang lut tawh lo mah se Antonio Conte naute thlamuang takin an awm bik lo.

Inter Milan hian Serie A match 26 an khelh aṭangin point 57 an hmu, khelh zat inangah champion lai leh hmahruai mektu Juve an phak lohna chu point ruk a ni - khelh hmabak 12 an la neih avangin thil a la danglam viau thei.

Italian manager Conte chuan, "Beisei kan la nei, league hi a tawp hma chuan tha kan thlah thiang lo. A umtu zawk kan nih avang erawh chuan kan ṭan mar a ngai dawn hle, khelh hmabak 12 kan la neih hi kan tan chuan final vek a ni.

"Lazio leh Juventus lakah kan beidawng lo a ni tih hi ka nauten khelmual chhungah a takin an lantir zel ang, anni pahnih hian point an la hloh ngei ang tih ka ring tlat a ni," a ti. Inter hian season bul an ṭan fuh a, kumin tir lama an chet fuh tawk loh vangin an hnufual.

Khawvel ram hrang hrang zingah Italy chu Covid-19 kai leh thi an tamna zinga mi a ni a, an ram chhungah pawh Atalanta awmna bial 'Bergamo' chu hri leng hluarna hmun a ni - tunah chuan he hmunah hian football an khel leh thei tawh.

Atalanta tan hian Duvan Zapata-a'n goal hnih a khung bakah Berat Djimsiti chuan a khung a, mikhual midfielder Mehdi Bourabia-a'n an mahni lamah a ti lut. Bourabia hian hun tawp dawnah a mualpho lutuk tur hliah nan a khung leh bawk.

Season hmasa khan Atalanta hian khawvel barakhaihin Champions League khel turin an tling a, UCL-ah hian quarterfinal an lut fel der tawh! Kuminah pawh league table-ah palina an ni mek a, European football inelna sang ber hi an khelh chhunzawm leh ngei pawh a rinawm.