Goan club laka la chak lo Aizawl FC ; Dar 2:05-ah AFC Vs Churchill; En man Rs 100
I League-ah Aizawl FC-in season liam ta khan Sporting Goa leh Salgaocar te RG Stadium, Mualpuiah an hneh lo ve ve a, Mizo club hian Goa-ah Goan club pahnih hi an draw ve ve bawk. India ram inelna sang berah AFC-in Goan club an la hneh lo.
Vawiin tlai dar 2:05 hian Mualpuiah Aizawl FC-in I League champion hlui Churchill Brothers an hmachhawn dawn a, Mizo club hi chak tura rinkai ni mah se a awlsam dawn lo. Inkhel en man hi Rs 100 a ni.
Goan club hmaah
Nikum January 25 khan Aizawl FC-in Sporting Goa an mikhual a, MPL club hi chak tura rin zawk ni mah se an mualpho a, 0-2 in an chak lo. Ni ruk hnuah AFC-in Salgaocar an hmachhawn leh a, Goa-ah 1-1 in an inhnehtawk.
April thlaah Aizawl FC dinhmun a ṭha tawh lo a, Goa-ah Sporting Goa lakah phuba an lak theih beisei an ni a; mahse point khat bakah an hlawh lo.
Mizo club hian anmahni ang bawka talbuai Salgaocar an mikhual zui a, Aizawl FC an mualpho nawn. Goan club-in Darryl Duffy goal hmangin AFC 1-0 in an hneh a, Mizo club-in Goan club an tluk loh avangin I League aṭangin an tla a, I League khel leh turin AIFF duhsakna an mamawh phah bawk.
Federation Cup 2016-ah erawh Aizawl FC-in Sporting Goa hi semifinal-ah hnehin final an lut a, amaherawhchu he mi ṭum pawh hian Aizawl leh Goa-ah team pahnih an inhnehtawk. Mizo club chakna hi away goal rule a ni.
Durand Cup 2016-ah Aizawl FC-in Goan club an hneh a, group match hmasa berah I League second division champion Dempo SC chu 3-1 in an hneh.
Churchill an ṭha
Churchill Brothers-in I League match sarih khelh tawh aṭangin point nga chiah an la hlawh chhuak a, an result aṭanga en chi an ni lo.
Goan club hian I League match hmasa pathumah Mohun Bagan, Mumbai FC leh East Bengal an hneh lo nghal a, amaherawhchu match thumah hian point hmuh phu khawpin an khel ṭha vek. Churchill hian DSK Shivajians leh Minerva Punjab lakah point khat an hlawh chhuak a, champion lai Bengaluru FC hneh thei team an nih avangin an ṭha tih a chiang.
Churchill hian tlarhmaah Trinidadian forward Anthony Anton Wolfe leh Liberian forward Ghanefo Ansumana Kromah te an inkawptir thei a, Kyrgyzstan midfielder Bektur Talgat Uulu bakah Indian player beiseiawm Brandon Fernandes, Chesterpoul Lyngdoh leh Surabuddin Mollick te an neih avangin AFC tlarhnung tan fimkhur a ṭul ang.
Amaherawhchu Churchill hian an defender pawimawh Rowilson Rodrigues an chhawr thei dawn lo a, foreigner palina an la lakluh loh bawk avangin tlarhnung an rem fuh erawh a ṭul ang.
Churchill coach thukhawchang
Churchill Brothers coach Alfred J. Fernandes chuan, "Foreigner ṭha tlarhnung tichak thei tur chu kan la dawn a, Aizawl FC erawh a hmachhawn hman dawn lo. Hei vang hian tlarhnung kan remfuh a ṭul dawn a, player kan thlan uluk a ṭul dawn a ni," tiin Rowilson awm lo chu pawi a tih thu a sawi.
Churchill boss Alfred chuan sawi chhunzawmin, "NorthEast-a inkhelh hi a awlsam lo a, keini tan chuan 'high altitude' hi buaipui tham a ni. Chutihrualin Aizawl FC pawh Goa khaw lumah an khelh a ṭul ve tho a, chhuanlam siamna tur a awm lo," tiin a sawi.
AFC an dam
Aizawl FC-in inhliam vanga Mohun Bagan an hneh loh ṭuma an chhawr thei loh Syrian midfielder Mahmoud al Amna an chhawr thei dawn a, chanchin duhawm lo erawh Lalruatthara'n yellow card vawi li a hmuh tawh avangin hrem vangin a inlan thei lo ang.
Mizo club coach Khalid Jamil chuan, "Churchill hi team ṭha tak an ni a, fimkhur takin kan khel ang. Result ṭha neih kan tum a, inkhel pawimawh a ni," tiin chak ngei an tum thu a sawi.
Tun season-ah Aizawl FC hian RG Stadium-ah match thum khel tawhin hnehna an la chang vek a, khual muala point li an hmu tawh nen match sariha an point hmuh tawh zat chu point 13 a ni.