Griezmann tan United a te

Atletico Madrid pre­sident Enrique Cere­zo chuan tun hnaia Man­chester United nena sawi zawm hlawh tak an forward chhuanvawr Antoine Griezmann tan Premier League club chu pan tur em chuan club tenau an nih thu a sawi!

France international hi nipui transfer bazar-ah United chuan pound maktaduai 68-in lakluh an tum dawn nia tarlan a ni a, Atletico hian an stadium thar sak mek Wanda Metropolitano tan sum an mamawh bawk si avangin Paul Pogba ṭhian ṭha hi England lama kaltir mai an hnial lo niin khawthlang media te chuan an ziak bawk.

Mahse Atletico Ma­drid president Enrique Cerezo chuan, "Man­chester United te chu club tenau alawm an nih. Tin, player emaw coach-in contract an ziak tawh a nih chuan an ziah ang ngeiin an awm turah ka ngai ṭhin a, chu chu coach Diego Simeone leh Griezmann chunga ka ngaihdan pawh a ni," a ti a, kum 25-a upa forward hian Atletico-ah 2021 thleng cham turin contract a nei.

Spanish thuthar theh­darhtute chuan Griez­mann hian Cham­pions League khel ngei club-ah lo chuan kal a duh an rin loh thu an tarlang bawk a, Jose Mourinho tan French forward hip lut turin palina chung lama Manchester United awmpui a pawimawh khawp ang.