Nomawi a la bo lo - Wenger

Arsene Wenger chuan Arsenal-in Premier League nomawi an la chawi theih a beisei a, hlawhtlinna chang tur erawh chuan an ṭanrual a pawimawh thu a sawi tel bawk.

Watford leh Chelsea an hneh loh hnuah Arsenal hian league hmahruaitu Blues chu point 12 zetin an phak lo tawh a, tun season-ah in­khelh hmabak match 14 an la nei.

Gunners manager Wenger chuan, "Man­chester United, Manches­ter City leh Liverpool te hian beiseina an nei sang a, sulhnu ropui tak nei an nih avangin elpui hautak tak an ni. Champion tur chuan kan ṭanrual a ngai a, kan khelh ṭhat loh lai pawhin fan-te puihna kan mamawh. Kan chak loh ṭuma ka player te hi ropui taka lo khel chhuak tawhte tho kha an ni," tiin a sawi.

France manager Wen­ger hi Burnley nen an inkhelh ṭuma a nungchang mawi lo vangin match li chhung a naute enkawl thei lo tura hrem lai a ni a, Inrinni zan dar 6:00 a Hull City an mikhual hunah hremna hi a hmang zo chiah ang.

Zawhna chhangin Wenger chuan, "Nomawi inchuh a la tawp lo, mi ten beisei nei tawh lo angin min ngai a nih pawhin kan tan chuan beiseina a tawp ve ngai lo. Kum dang zawng aiin thun season chu inelna a hautak zawk a, dinhmun ṭha luah turin thawhrim a ngai hle," tiin a sawi.