Kolasib laka phuba lak tum Siaha

Nikum Inter District Junior Football Championships-ah Siaha-in Kolasib an hneh loh avangin group stage an paltlang lo a, Lawngtlaia inelna neihah hian Kolasib an champion. Vawiin tlai dar 1:00 hian 2017 District Junior Football final-ah Kolasib leh Siaha an inhmachhawn dawn a, District Playground, Gaihti-ah khelh a ni ang.

Phuba hmasa

Kumin inelna opening match-ah Siaha-in Ng Laldinpuia goal hnih bakah Dickson Lalṭhapuia, Joseph Lalruatdika leh S. Beirahropha te goal hmangin Kolasib 5-1 in an sawp a, hei hi phuba lakna hmasa a ni. Mikhual team tan Vanlalnghaka'n goal khat a khung ve a, Kolasib mualphona a hliah pha lo.

Kolasib coach C. Malsawm­tluanga (Junior-a) chuan, "Siaha khelmual kan la hrethiam chiah lo a, kan zin chauh avangin ngai kan la awh lo bawk. Goal nga zet khung mah se inkhelah an chungnung tihna a ni lo a, an goal khungte hi vanneih goal vek a ni," tiin Siaha chak dan chu chhuan tur a awm loh thu Vanglaini palai a hrilh.

Phuba chu?

Siaha coach F. Lalmuanpuia chuan, "Kolasib kan hneh ṭumin kan khel ṭha hrim hrim a, chutihrualin anni lam hian field an hriat chian loh vang niin an sawi. Tunah chuan match li an khel tawh a, an hrethiam tawh ang," tiin chhuanlam awm loa Kolasib hneh an tum thu a sawi ve bawk.

Siaha hi an muala khel tur an ni a, tlarhmaah Ng Laldinpuia (Mapuia), Samson leh Dickson Lalṭhapuia te an kawl avangin khawtual mipui tan lawmna thlen turin an inringtawk. ECM Veng rawlthar Mapuia hi Mizoram aiawha kal tawh a ni a, goal nga khung tawh niin top scorer a ni a, ven tham a ni. Tlarhnungah Beira leh Benjamin te an nei bawk a, an mual ngeia nomawi chawi an tum dawn a ni.

Kolasib lamin semifinal-a an chhawr theih loh Siaha lama goal khung tawh Vanlalnghaka tlarhmaah an hmang thei tawh dawn a, jersey no. 10 ha chunga mipui tana hmuhnawmna siamsak ṭhintu Lalnunsanga leh Mizoram aiawha inlan tawh Norbert Lalfak­awma te midfield-ah an awm bawk avangin champion nawn an inbeisei hi a mak hran lo.

Final Kalkawng
SIAHA
Group Stage
Siaha 5 - 1 Kolasib
SIA : Dickson Lalṭhapuia 18'; Ng Laldinpuia 67', 69'; Joseph Lalruatdika 72'; S. Beirahropha 80'
KOL : Vanlalnghaka 76'
Lawngtlai 0 - 3 Siaha
SIA : Ng Laldinpuia 1', 73'; R. Lalchharmawia (OG) 77'
Champhai 2 - 3 Siaha
CHA : Lalrinenga 24'; Khaibiakthanga 59'
SIA : Samsona 16', 60'; Vanlalhruaitluanga 55'; Lalpekthara 90+2' (OG)
Semifinal
Siaha 1 - 0 Mamit
SIA : NG Laldinpuia 59'
KOLASIB
Group Stage
Siaha 5 - 1 Kolasib
SIA : Dickson Lalṭhapuia 18'; Ng Laldinpuia 67', 69'; Joseph Lalruatdika 72'; S. Beirahropha 80'
KOL : Vanlalnghaka 76'
Kolasib 2 - 1 Champhai
KOL : Norbert Lalfakawma 76'; Vanlalnghaka 78'
CHA : Vanlalhruaia 90'
Kolasib 4 - 3 Lawngtlai
KOL : Jerry N Lalrohluzuala 16'(OG); Lalhmunhluna 38'; HC Lallawmzuala 44'; Daniel Laltanpuia 67'
LAW : Kapchungnunga 52'; H Lalzirliana 57', 64
Semifinal
Kolasib 2 - 2 Aizawl
KOL : Lalhmunhlima 16'; Zomuanpuia 21' (OG)
AIZ : Zomuanpuia 29'; Ricky Lalruatfela 47'
Penalty shootout-ah Kolasib 3-2 in an chak