Dimitrov-a'n Covid-19 a kai

Tennis world number 19 Grigor Dimitrov chuan Covid-19 a kai tih hriat chhuah a ni a, tun hnaia a inkhelh pui leh chenpui hnai deuhte chu hmanhmawh taka endik zui ve nghal an ni.

Coronavirus vangin March thla aṭang khan tennis inelna pangngai a awm lo. World number 1 Novak Djokovic huaihawtin Adria Tour an buatsaih a, player langsar pariat an tel.

Inelna hi thawh thumna neih tur a ni a, kar hmasa khan a thawh hnihna an khel. Inrinni zan khan Dimitrov hi Borna Coric lakah a chak lo, match hnihna khel leh tur ni mah se khawsik vangin a inhnukdawk.

Bulgarian tlangval hi a khua a sik avangin hripui a kai em tih endik a ni a, a lo kai ngei bawk. Instagram-ah hri a kai thu hi a tarlang a, natna chu tuar thei viau mah se midang hlauthawng taka a siam avangin hriatthiamna a dil.

Adria Tour-ah hian Dimitrov bakah Djokovic, Zverev leh Marin Cilic te pawh an tel, anni ho hian tennis bakah basketball an khel ho bawk. A ṭhiante hi chuan hri an kai em tih finfiah a la ni lo thung.

Inelna hi ATP leh WTA hnuaia mi a ni lo a, match an neih hian a hmuna entu pawh an awm ṭhin. A hmawrbawkna July thla a neih an tum erawh player zingah hri kai an awm tak avang hian ṭhulh fel nghal a ni.