Chennai City-in coach thar nei

I League mawngphah team Chennai City chuan an coach Robin Charles Raja an ban thu an puan hnu lawkah coach thar an nei ve lehnghal a, India Under 16 leh Under 19 coach hlui V Soundararajan an lalut.

Chennai City hi league lama beisei an phak loh piah lamah an club kalphunga local players tam zawk chhawr chungchangah an coach Robin Charles nen an inhmuhthiam loh avangin Robin hi an ban a, Santosh Trophy a Tamil Nadu leh Andhra Pradesh enkawl tawhtu Soundararajan hi an lalut ta a ni.

Indian coach zinga AFC pro license nei tlemte zinga mi Soundararajan chuan, "Tualchhung player tam zawkin hmun an chan theihna tura pui turin Chennai City nen hian kan inrem a, league table-ah a mawng phah kan nih avangin chona hautak ka hmachhawn dawn tih ka hria a ni," a ti.

Chennai City hian coach thar hnuaia an league match hmasa ber chu Inrinni zanah Mumbai FC nen an khel ang.