FA Cup last 16-ah Premier League club pariat ; Leicester City an vannei ve ta
Nilaini zan khan Leicester City-in King Power Stadium-ah Derby County 3-1 in an hneh. Premier League champion lai Foxes hian Championship club hneh turin extra time khelh an mamawh a, hnehna an chan avangin kuminah a vawi khat nan an mualah an chak.
Claudio Ranieri hote hian last 16-ah League One club Millwall an hmachhawn dawn a, FA Cup fifth round hi February 18-20 a khelh tur a ni. Last 16-ah hian Premier League club pariat an awm a, team pakhatmah an inhmachhawn loh avangin quarterfinal-ah Premier League club vek an lut thei tihna a ni.
Goal li luhna
FA Cup fourth round inkhel zinga replay awmchhunah Foxes-in second half ṭantirha Andy King-a tauh luh hmangin hma an hruai a, Derby-in Abdoul Camara freekick hmangin an sut. Leicester an vanduai chhunzawm a, box pawna Derby keeper Jonathan Mitchell-a'n ball a ben thlak chu referee-in a hmu lo. Championship club defender Max Lowe-a'n anmahni lam goal ban a tih per bawk.
Hun pangngaiah chak zawk hriat theih a ni lo a, extra time-ah erawh chak tura rinkai Leicester an chungnung. Minute 94-naah substitute Wilfred Ndidi-a'n Derby defender venna hnuaiah goal ṭha bik a khung a, Leicester tan Demarai Gray-a'n khalh tlangin minute 114-naah chak nemnghehna goal a khung leh bawk.
FA Cup a hlu lo!
Leicester leh Derby ten league match an ngai pawimawh tih a chiang a, Italian manager Claudio Ranieri-a'n Manchester United an hneh loh ṭum aṭangin player 10 zet a thlak. Foxes hi Premier League-ah point 21 chauh an hmuh avangin tlak an hlau tih a lang chiang hle.
Derby boss Steve McClaren-a'n season thara Premier League khelh beiseiin an match hnuhnung ber aṭangin player pariat zet a thlak ve bawk a, an intawn hmasak ṭuma man of the match Will Hughes pawh squad-ah telh a ni lo.
Foxes an tho?
Leicester City hian Pride Park Stadium-ah Derby hi 2-2 an draw hram a, an vanneih a zarah replay thlengin fifth round an lut zui bawk.
Claudio Ranieri hote hi season liam ta khan Premier League-ah nomawi chawi mah se team ṭha ber an ni lo a, vanneih vanga chakna match an ngah. Tun season-ah erawh an ṭha tawk lo a, an vannei tawk lo bawk.
Foxes-in an muala Derby an hnehna hi King Power Stadium-a kumin bika an vawi khat chakna a ni a, kum 2017-a an vawi hnih chakna chauh a ni. Premier League champion hian January 7 khan FA Cup third round-ah Everton an hneh a, kumin hian league-ah hneh an la nei lo. Claudio Ranieri hote hian FA Cup-a an chet ṭhat hi league lamah chhunzawm an tum dawn a, Pathianni zan khian khualmualah Swansea City an hmachhawn ang.
Eng nge an sawi?
Leicester manager Claudio Ranieri chuan, "Engkim hi kan duh loh ang zawng vekin a thleng emaw tih tur a ni a, tunah erawh lawmna tur kan nei ve ta. Hnehna chan hi kan mamawh tak a ni a, kan duh ber a ni bawk. Inelna zawng zawnga chet ṭhat hi kan duh a, FA Cup-ah hian champion kan tum tur a ni a, Premier League-ah erawh tlak loh kan tum tur a ni," tiin an dinhmun a hrechiang hle.
Derby manager Steve McClaren chuan, "Team pahnih hian replay khelh kan duh lo a, extra time khelh phei kha chu kan duh lo lehzual. Player-te kha an chau tawh a, dem thei ka ni lo. Squad neih ṭhat a pawimawh a, player ṭha ngah zawk an chak," tiin an ṭhat tawk loh thu a sawi.
FA Cup Result & Fixtures
February 8, Nilaini
Leicester City 3-1 Derby County
LEI : Andy King 46'; Wilfred Ndidi 94'; Demarai Gray 114'
DER : Abdoul Camara 61'
Last 16
February 18, Inrinni
Burnley 6:00 PM Lincoln City
Middlesbrough 8:30 PM Oxford United
Huddersfield Town 8:30 PM Manchester City
Millwall 8:30 PM Leicester City
Wolverhampton 11:00 PM Chelsea
February 19, Pathianni
Fulham 7:30 PM Tottenham Hotspur
Blackburn Rovers 9:45 PM Manchester United
February 20, Thawhṭanni
Sutton United 1:25 AM Arsenal