Sharapova hma hun a eng

World number 1 hlui Maria Sharapova chu hrem vangin inkhel thei lo mek mah se chanchin lawmawm a nei chho mek zel. May 5 aṭanga khelh ṭan tur Madrid Open-a a inlan theih nan 'wildcard' pek a ni.

Russian star hi kum hnih chhung atana hrem­na chu thla 15 atan tih tawi sak a nih vangin April thlaah a inkhel thei leh tawh dawn a, a hmasa ber atan Stuttgart Grand Prix-ah a inlan tur thu a lo sawi tawh.

Player ngaihven hlawh leh thleng sang thei tura beisei, a bik takin inelna an buatsaihna hmuna hnu­hma lo nei ṭha tawh leh mipuite ngaihven bik, an ranking a hniam vanga direct a inlan thei si lo te hnenah wildcard hi pek ṭhin a ni.

Madrid Open director Manolo Santana chuan, "Sharapova hi tun hnai kum 15 chhunga hmeichhe player ṭha berte zinga mi a ni a, Madrid-ah hian a lo champion tawh a, kuminah pawh harsatna dang a thleng thut a nih loh chuan a inlan ngei kan beisei," tiin a sawi. Grand Slam vawi nga champion tawh Shavapova hian kum 2014 khan Simona Halep hnehin Madrid Open nomawi hi a lo chawi tawh.