Qatar-in sum seng hnem
Kum 2022 FIFA World Cup thleng tura inbuatsaih mek Qatar chuan football khawvela ram leh ram inelna sang ber thleng turin khelmual leh thil dang dang sak ṭhat leh thuam nan kartin pound maktaduai 400 an sen ziah thu an sawi. Qatar finance minister Ali al-Emadi chuan tuna an sum hman dan ang hian inbuatsaihna chu kum thum aṭanga kum li thleng an la kalpui a rin thu a sawi.
Ruahman dan chuan Qatar hian World Cup thlen nan pound tluklehdingawn 160 tal an seng tura ngaih a ni a, an ruahmanna zat hi an seng a nih chuan Brazil-in World Cup 2014 thlen nan pound tluklehdingawn 8.8 an sen leh Russia-in 2018 World Cup thlen nana pound tluklehdingawn 10.7 an sen chu an khum chiang dawn hle tihna a ni.
Brazil khan World Cup an thlen dawn khan a hunah tak an inpeih hman lo a, Qatar finance minister Emadi erawh chuan buaina an neih loh tur thu leh 90% contract chu hnathawk turte hnenah pek a nih tawh thu a sawi a, thla 24 chhungin hmun thuma ṭhena hmun hnih chuan an hna an zawh tawh an beisei thu a sawi bawk.
Qatar hian World Cup thlen an tumna kawngah Asia khawmualpui chhim lam aṭangin hnathawk tur an chaw lut nasa nia sawi a ni a, human rights group ṭhenkhat chuan an hnathawkte hrehawm taka chhawrah puhin Qatar hi a lo mualpho hle tawh. Mahse, Qatar chuan heng puhna te hi phain December khan hnathawkte hamṭhatna tur a duang thar a ni. Nikum khan World Cup atana an budget ruahman chu hniam hman bawk mah se tun hnaia oil man a san leh tak avangin oil vanga hausa ram tan hian hnathawh a awlsam leh tawh thu Emadi chuan a sawi.